ខេត្តព្រះវិហារ ៖ កាលពីថ្ងៃទី១៤ មិថុនា ឆ្នាំ២០២១ មេបញ្ជាការតំបន់ប្រតិបត្តិការសឹករងព្រះវិហារ លោកឧត្តមសេនីយ៍ទោ ច័ន្ទ សុភ័ក្ត្រា ដែលជាប្រធានសមាគមអតីតយុទ្ធជនកម្ពុជា ខេត្តព្រះវិហារ បានដឹកនាំក្រុមការងារថ្នាក់ខេត្ត ស្រុក មន្ត្រី និងអាជ្ញាធរក្នុងមូលដ្ឋានគ្រប់លំដាប់ថ្នាក់ ចុះសង់ផ្ទះពីរខ្នង ជូនអតីតយុទ្ធជន ២គ្រួសារ ដែលកំពុងរស់នៅក្នុងផ្ទះទ្រុឌទ្រោម និងមានជីវភាពខ្វះខាត ស្ថិតនៅក្នុងភូមិគូលែនជើង ឃុំគូលែនជើង ស្រុកគូលែន ខេត្តព្រះវិហារ។
លោកឧត្តមសេនីយ៍ទោ ច័ន្ទ សុភ័ក្ត្រា បានមានប្រសាសន៍ថា ដោយមើលឃើញពីការខ្វះខាត និងក្រោមការគិតគូខ្ពស់ ពីសម្តេចតេជោ នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា សម្តេចបានចំណាយថវិកា ២៤លានរៀល ប្រគល់ជូនសមាគមអតីតយុទ្ធជន ខេត្តព្រះវិហារ តាមរយៈទេសរដ្ឋមន្ត្រី គន់ គីម ដែលជាអគ្គលេខាធិការសមាគម និងអភិបាលខេត្តព្រះវិហារ លោក ប្រាក់ សុវណ្ណ ដែលជាប្រធានកិត្តិយសសមាគមអតីតយុទ្ធជនខេត្តព្រះវិហារ ដើម្បីចុះរៀបចំទីកន្លែង និងការសាងសង់ផ្ទះជូនអតីតយុទ្ធជន និងគ្រួសារ ចំនួន ២គ្រួសារបន្ថែមទៀត សម្រាប់ការរស់នៅបានសមរម្យ ផងដែរ។
លោកប្រធានសមាគម អតីតយុទ្ធជនកម្ពុជា ខេត្តព្រះវិហារ បានមានប្រសាសន៍ទៀតថា ផ្ទះទាំងពីរខ្នង ដែលត្រូវសាងសង់ជូន អតីតយុទ្ធជនទាំងពីរគ្រួសារ នៅក្នុងពេលនេះ គឺ ផ្ទះ ១ខ្នងៗ ត្រូវបានសង់ឡើងក្នុងទំហំទទឹង ៦ម៉ែត្រ និងបណ្តោយ ៧ម៉ែត្រ ធ្វើពីឈើ ដំបូលប្រក់ស័ង្កសី ហើយក្នុងផ្ទះ ១ខ្នង ត្រូវបានចំណាយថវិកាអស់ ១២លានរៀល។ ដូច្នេះ ផ្ទះទាំង ២ខ្នង បានចំណាយថវិកា សរុប ចំនួន ២៤លានរៀល ដែលជាថវិការបស់ សម្តេចតេជោ នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា។ លោកថា ផ្ទះទាំង ២ខ្នងនេះ នឹងត្រូវប្រគល់ជូន ១-ឈ្មោះ ថន ឃឿន ភេទប្រុស អាយុ ៤៨ឆ្នាំ ជាជនបាត់បង់សមត្ថភាព និង ២-ឈ្មោះ កឹម ចឹ ភេទប្រុស អាយុ ៥៦ឆ្នាំ ជាជនពិការ និងនៅក្រោយពីទទួលបានផ្ទះរួចហើយ អតីតយុទ្ធជនទាំង ២គ្រួសារ ក្នុង១គ្រួសារ ទទួលបានការឧបត្ថម្ភបន្ថែម នូវថវិកា ៥ ម៉ឺនរៀល អង្ករ ៣០គីឡូក្រាម ទឹកស៊ីអ៊ីវ ១យួរ មី១កេស និងក្រម៉ា១ ថែមទៀតផង។
លោកឧត្តមសេនីយ៍ទោ ច័ន្ទ សុភ័ក្ត្រា បានបញ្ជាក់ថា ថ្នាក់ដឹកនាំសមាគមអតីតយុទ្ធជន គ្រប់លំដាប់ថ្នាក់ទាំងអស់ ពិសេស សម្តេចតេជោ ហ៊ុន សែន សម្តេចតែងតែគិតគូ យកចិត្តទុកដាក់ ចំពោះបងប្អូនជានិច្ច ពេលបងប្អូនគ្មានដី គ្មានផ្ទះ សម្តេចបានផ្តល់ដី និងការសង់ផ្ទះជូនបងប្អូន បានបង្កបង្កើនផល និងការរស់នៅប្រកបរបរចិញ្ចឹមជីវិត បានសមរម្យ ព្រោះបងប្អូនអតីតយុទ្ធជនទាំងអស់ ធ្លាប់បានបូជាសាច់ស្រស់ឈាមស្រស់ ក្នុងបុព្វហេតុការពារទឹកដី និងបានធ្វើឲ្យប្រទេសជាតិ មានការរីកចម្រើនលើគ្រប់វិស័យ និងមានសុខសន្តិភាពរហូតមកដល់សព្វថ្ងៃនេះ។ ដូច្នេះ ប្រមុខរាជរដ្ឋាភិបាល និងថ្នាក់ដឹកនាំសមាគមអតីតយុទ្ធជនកម្ពុជា នៅតែចងចាំជានិច្ច នូវគុណបំណាច់របស់បងប្អូន ដែលបានលះបង់អាយុជីវិត ដើម្បីប្រទេសជាតិ និងប្រជាជនកម្ពុជា។ ទន្ទឹមនឹងនោះ លោកឧត្តមសេនីយ៍ទោ ច័ន្ទ សុភ័ក្ត្រា បានប្រាប់អតីតយុទ្ធជន និងគ្រួសារថា សូមកុំជឿតាមការញុះញង់ ការអូសទាញ និងការឃោសនាអគតិណាមួយ តាមក្រុមធ្វើនយោបាយប្រឆាំងក្រៅច្បាប់ឲ្យសោះ ហើយអ្នកដែលជួយដោះស្រាយបញ្ហា ទុក្ខលំបាករបស់បងប្អូនពិតប្រាកដ មានតែសម្តេចតេជោ ហ៊ុន សែន ដែលជាប្រធានសមាគមអតីតយុទ្ធជនកម្ពុជា និងជាប្រធានគណបក្សប្រជាជនកម្ពុជា តែប៉ុណ្ណោះ ៕
