ខេត្តព្រៃវែង ៖ កាលពីវេលាម៉ោង៧ និង៣០នាទីយប់ ថ្ងៃទី៨ ខែមិថុនា ឆ្នាំ២០២១ នៅកំណាត់ផ្លូវជាតិលេខ១ នៅត្រង់ចំណុចលើស្ពានអ្នកលឿង ស្ថិតក្នុងភូមិ២ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែងកម្លាំងកងរាជអាវុធហត្ថខេត្តព្រៃវែង ស្ទាក់ចាប់រថយន្តសាំយ៉ុងមួយគ្រឿងព៌ណទឹកប៊ិច ពាក់ស្លាកលខ ភ្នំពេញ 2AK.3057 ដែលលួចដឹកទូរស័ព្ទដៃទំនើបៗគេចពន្ធ បម្រុងលោតឆ័ត្រចេញទៅប្រទេសវៀតណាម។ តាមប្រភពពត៌មាន ទូរសព្ទ័ទាំងអស់នេះ គឺឈ្មួញមានបំណងលួចនាំចេញទៅប្រទេសវៀតណាម តាមច្រករបៀងក្នុងទឹកដីខេត្តស្វាយរៀង តែពេលមកដល់ទឹកដីស្រុកពាមរក៌ ក៏ត្រូវបានកម្លាំងអាវុធហត្ថស្ទាក់ចាប់ឃាត់បានតែម្តង។
មន្ត្រីរាជអាវុធហត្ថខេត្តព្រៃវែង បានអោយដឹងថា រថយន្តសាំយ៉ុងដឹកទូរស័ព្ទដៃគេចពន្ធដែលកម្លាំងអាវុធហត្ថស្ទាក់ចាប់បាននេះ បើកបរដោយឈ្មោះ ខែម ទី ភេទប្រុសអាយុ៣៩ឆ្នាំ មានទីលំនៅភូមិអង្គក្តួច ស្រុកចន្ទ្រា ខេត្តស្វាយរៀងហើយត្រូវបានឃាត់ខ្លួនផងដែរ។
បន្ទាប់ពីមន្ត្រីជំនាញធ្វើការឆែកឆេររកឃើញទូរសព្ទ័ដៃស៊េរីទំនើបចំនួន៤៦៨០គ្រឿង ដែលអត់មានឯកសារបង់ពន្ធអ្វីទាំងអស់ ដែលក្នុងនោះ រួមមាន៖1/ទូរសព្ទដៃម៉ាក iphone 12(promax)ចំនួន៧៦៨ គ្រឿង។២./ ទូរសព្ទដៃម៉ាក iphone 12 ចំនួន ៩៤ គ្រឿង។៣./ ទូរសព្ទដៃម៉ាក iphone 11(promax)ចំនួន៦៨៤គ្រឿង។៤./ទូរសព្ទដៃម៉ាក iphone 11 ចំនួន ១៥៥៥គ្រឿង។៥./ ទូរសព្ទដៃម៉ាក iphone(xsmax)ចំនួន ៧៣៨គ្រឿង។៦/. ទូរសព្ទដៃម៉ាក iphone 7(plus)ចំនួន ៦៧៩គ្រឿង។៧./ ទូរសព្ទដៃម៉ាក iphone 7 ចំនួន ១៦២ គ្រឿង។
គួរបញ្ជាក់ផងដែរថា ក្រោយពីចាប់ឃាត់រថយន្តខាងលើបានភ្លាម ទាំងមនុស្សនិងវត្ថុតាង ត្រូវបានអាវុធហត្ថប្រគល់ទៅអោយមន្ត្រីសាខាគយខេត្តព្រៃវែងទាំងយប់ ដើម្បីចាត់ការបន្ត។ប៉ុន្តែគេមិនទាន់ដឹងអត្តសញ្ញាណម្ចាស់ទំនិញគេចពន្ធនោះនៅទ្បើយទេ៕
