ខេត្តកំពង់ឆ្នាំង ៖ នៅថ្ងៃទី៣១ ខែឧសភា ឆ្នាំ២០២១ វេលាម៉ោង១៣៖៣០នាទី ដោយបានការអនុញ្ញាតពីលោកឧត្ដមសេនីយ៍ត្រី សាក់ សារ៉ាង មេបញ្ជាការអ.ហខេត្តកំពង់ឆ្នាំង និងមានការសម្របសម្រួលពីឯកឧត្តម អ៊ិតសុធា ព្រះរាជអាជ្ញាអមសាលាដំបូងខេត្តកំពង់ឆ្នាំង កម្លាំងការិយាល័យព្រហ្មទណ្ឌអ.ហខេត្តចំនួន០៤នាក់ ដឹកនាំដោយលោកវរសេនីយ៍ឯក ហង្ស សុជាតិ មេបញ្ជាការរងទទួលផែនយុត្តិធម៍ បានឃាត់ក្រុមគ្រឿងចក្រនិងរថយន្តដឹកដីធ្វើសកម្មភាពជីកនិងដឹកអាចម៍ដីគ្មានច្បាប់ យោងតាមបទល្មើសជាក់ស្តែង ស្ថិតនៅចំនុចបឹងអំរែក ភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
លោកវរសេនីយ៍ឯក ហង្ស សុជាតិ មេបញ្ជាការរងទទួលផែនយុត្តិធម៍បានឲ្យដឹងថា ក្នុងការចុះឃាត់សកម្មភាពជីកដី និងដឹកអាចម៍ដីគ្មានច្បាប់អនុញ្ញាតខាងលើនេះ សមត្ថកិច្ចបានធ្វើការឃាត់ខ្លួនជនសង្ស័យចំនួន០១នាក់ឈ្មោះ សោម សុម៉ាលីន ភេទស្រី អាយុ៥៧ឆ្នាំ មុខរបរ អាជីវករជាម្ចាស់ដីរស់នៅភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង។ វត្ថុតាងចាប់យករួមមានអេស្កាវ៉ាទ័រចំនួន០៤គ្រឿង ឡានបែនដឹកដីចំនួន០៦គ្រឿង។
បច្ចុប្បន្នជនសង្ស័យ និងវត្ថុតាងខាងលើត្រូវបានការិយាល័យជំនាញកំពុងរៀបចំឯកសារ ប្រគល់- ទទួល ឲ្យខាងរដ្ឋបាលជលផលខេត្តកំពង់ឆ្នាំងដេីម្បីបន្តនិតិវិធី ៕
