ខេត្តកំពង់ធំ ៖ នៅចំណុចផ្លូវលំ ក្នុងឃុំទីពោ ស្រុកសន្ទុក ខេត្តកំពង់ធំ នាយប់ថ្ងៃទី ២៥ ខែឧសភា ឆ្នាំ ២០២១ កម្លាំងសមត្ថកិច្ចចម្រុះ ដឹកនាំដោយលោកមុំ សុផល នាយផ្នែករដ្ឋបាលព្រៃឈើកំពង់ថ្មី សហការជាមួយនឹងកងរាជអាវុធហត្ថខេត្តកំពង់ធំជាច្រើនរូប ក្រោមការសម្របសម្រួលដោយលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ បានធ្វើការឃាត់រថយន្តមួយគ្រឿងប្រមូលផល អនុផលព្រៃឈើគ្មានច្បាប់អនុញ្ញាត ។
លោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ បានឲ្យដឹងថានេះគឺជាបទល្មើសជាក់ស្ដែងដែលក្រុមឈ្មួញធ្វើការដឹកប្រមូលផល អនុផលព្រៃឈើ ដោយគ្មានច្បាប់ នៅបានធ្វើចរាចរណ៍ជូនតាមផ្លូវសាធារណៈដែលស្ថិតនៅក្នុងភូមិអណ្ដូងបី និងភូមិបុស្សចំបក់ ឃុំទីពោ ស្រុកសន្ទុក យើងក៏បានបញ្ជាឱ្យកម្លាំងនិងមន្ត្រីជំនាញចុះធ្វើការឃាត់ និងបានប្រមូលយកវត្ថុតាងមួយចំនួនយកមករក្សាទុកនៅសង្កាត់រដ្ឋបាលព្រៃឈើតាំងក្រសាំង ដើម្បីចាត់ការទៅតាមនីតិវិធីច្បាប់។
លោក មុំ សុផល នាយផ្នែករដ្ឋបាលព្រៃឈើបានអោយដឹងថា ការដឹកជញ្ជូនផល អនុផលព្រៃឈើនេះ វាស្ថិតនៅមាត្រា ៩៦ ចំណែកចំនួនកំណត់ឈើ យើងមិនទាន់បានរាប់នៅឡើយទេ ។ លោកបានបញ្ជាក់ថា ករណីនេះយើងត្រូវពិន័យអន្តរការណ៍ពីរដ្ឋបាលព្រៃឈើ ជាទឹកប្រាក់ពីពីរទីបីដង នៃតម្លៃវត្ថុតាង ឬអាចបញ្ជូនទៅការសាលាដំបូងខេត្តចាត់ការតាមផ្លូវច្បាប់ ។ ចំពោះរថយន្តគ្មានស្លាកលេខនោះ យើងទុកអោយខាងជំនាញជាអ្នកចាត់ចែងនិតិវិធីច្បាប់បន្ថែមទៀត ។ចំណែកតៃកុងរថយន្តខាងលើនេះបាននាំគ្នាបើកទ្វាររថយន្តរត់គេចចូលព្រៃបាត់ស្រមោល ។
បច្ចុប្បន្នរថយន្ត និងវត្ថុតាងទាំងអស់ ត្រូវបានមន្ត្រីជំនាញយកទៅរក្សាទុកនៅរដ្ឋបាលព្រៃឈើតាំងក្រសាំង រង់ចាំម្ចាស់មកដោះស្រាយតាមនិតិវិធីច្បាប់ ៕
រថយន្តដឹកប្រមូល ផលអនុផលព្រៃឈើ គ្មានច្បាប់អនុញ្ញាត ត្រូវបាន កម្លាំងសមត្ថកិច្ចចម្រុះ ធ្វើការបង្រ្កាប
Filed in: សន្តិសុខ សង្គម
