ខេត្តកំពង់ឆ្នាំង ៖ មនុស្សម្នាក់រងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍មួយរវាងរថយន្តដឹកទំនិញធុនធ្ងន់ ២ គ្រឿង ក្នុងទិសដៅច្រាស់គ្នា នៅវេលាម៉ោង ៣ និង ៥៥ នាទី ព្រឹក ថ្ងៃទី២៣ ខែឧសភា ឆ្នាំ២០២១ នៅលើកំណាត់ផ្លូវជាតិលេខ ០៥ ចន្លោះបង្គោលគីឡូម៉ែត្រ លេខ៨៦-៨៧ ត្រង់ ចំណុចមុខហាងនាងពួន ស្ថិតនៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
សមត្ថកិច្ចបានឲ្យដឹងថា រថយន្ត ទី ១ ម៉ាក HYUNDAI ពណ៌ក្រហម ពាក់ស្លាកលេខ កំពង់ស្ពឺ 3A-1966 សណ្តោងរ៉ឺម៉កពណ៌ស ពាក់ស្លាកលេខ ភ្នំពេញ 4A-2829 ដែលជារបស់ក្រុមហ៊ុនដឹកជញ្ជូនទំនិញអក្សរ K បើកបរដោយឈ្មោះ វ័ន សុខហេង ភេទប្រុស អាយុ ២៦ ឆ្នាំ ជនជាតិខ្មែរ មានទីលំនៅ ភូមិបសែត ឃុំបសែត ស្រុកបសែត ខេត្តកំពង់ស្ពឺ ដោយមានអ្នករួមដំណើរជាមួយចំនួន ០១ នាក់ បើកបរចេញពីខាងត្បូង ទៅទិស ខាងជើង ។ លុះពេលបើកបរមកដល់ត្រង់ចំណុចខាងលើ ក៏បានបុកជាមួយរថយន្ត ០១ គ្រឿងម៉ាក HYUNDIA ពណ៌ខៀវ ពាក់ស្លាកលេខ ព្រះ សីហនុ 3A-3959 សណ្តោងរ៉ឺម៉ក ពណ៌ខៀវ ពាក់ស្លាកលេខ ភ្នំពេញ 4A-0599 ដែលជារបស់ក្រុមហ៊ុនដឹកជញ្ជូនទំនិញ អក្សរ T បើកបរ ដោយឈ្មោះ គ្រុឌ លីណា ភេទប្រុស អាយុ ៣៥ ឆ្នាំ ជនជាតិខ្មែរ មានទីលំនៅ ភូមិព្រៃទាវ ឃុំស្រែអំបិល ស្រុកស្អាង ខេត្តកណ្ដាល បើកបរ ម្នាក់ឯង ក្នុងទិសដៅពីជើង ទៅ ទិសខាងត្បូង ក្នុងដំណើរច្រាសទិសគ្នា ។ ក្នុងហេតុការណ៍នេះ បណ្តាលឲ្យរងរបួសធ្ងន់ មនុស្ស ០១ នាក់ និង ខូចខាតរថយន្ត ០២ គ្រឿងធ្ងន់ធ្ងរ ។
តាមការបញ្ជាក់ពីសមត្ថកិច្ច បានឲ្យដឹងថា គ្រោះថ្នាក់ចរាចរណ៍នេះ បណ្ដាលមកពីងងុយដេក ពេលបើកបរ ។
ក្រោយកើតហេតុ មធ្យោបាយទាំង ២ គ្រឿង ត្រូវបានសមត្ថកិច្ច យកមករក្សាទុកនៅ អធិការដ្ឋាននគរបាលក្រុងកំពង់ឆ្នាំង ដើម្បីដោះស្រាយ តាមនីតិវិធី ៕
