អន្តរជាតិ ៖ ក្រសួងសុខាភិបាលម៉ាឡេស៊ី នៅថ្ងៃពុធម្សិលមិញ បានរាយការណ៍ឲ្យដឹថា ប្រទេសម៉ាឡេស៊ី រកឃើញករណីឆ្លង COVID-19 ចំនួន ៦,០៧៥ករណីបន្ថែមទៀតក្នុងរយៈពេលតែ១ថ្ងៃ ដែលនេះគឺជាអត្រាឆ្លងប្រចាំថ្ងៃខ្ពស់បំផុតមិនធ្លាប់មាន ចាប់តាំងពីមានផ្ទុះជំងឺនេះមក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានចិនស៊ីនហួរ។
ក្នុងរយៈពេលដូចគ្នានេះក៏បានប្រកាសពីករណីស្លាប់ថ្មីចំនួន៤៦នាក់ទៀតផងដែរ ដែលនាំចំនួនអ្នកស្លាប់ប្រទេសអាស៊ានមួយនេះសរុបកើនដល់ ២,០៤០នាក់ ក្នុងចំណោមករណីឆ្លងសរុបជាង ៤៨៥,០០០ករណី។
រដ្ឋមន្ត្រីក្រសួងសុខាភិបាលលោក Noor Hisham Abdullah បានគូសបញ្ជាក់នៅក្នុងសេចក្តីប្រកាសព័ត៌មានថា ក្នុងចំណោមករណីទាំងអស់នោះ មានតែ៣ករណីប៉ុណ្ណោះជាករណីនាំចូល ខណៈដែល ៦,០៧២ករណីទៀត សុទ្ធតែជាករណីឆ្លងក្នុងសហគមន៍។
ទន្ទឹមនោះ រដ្ឋមន្ត្រីរូបនោះបានអំពាវនាវឱ្យសាធារណជនគោរពតាមនីតិវិធីប្រតិបត្តិស្តង់ដារ (SOP) និងគោលការណ៍ណែនាំរបស់ក្រសួងសុខាបាល ដើម្បីជួយគ្រប់គ្រងស្ថានការណ៍ និងរួមគ្នាជាប្រជាជាតិមួយដើម្បីប្រឈមនឹងជំងឺរាតត្បាតដ៏កាចសាហាវនេះ៕
