ខេត្តកំពង់ធំ ៖ នៅចំណុចវាលស្រែខាងលិចភូមិសេរីចំប៉ា ឃុំជ្រលង ស្រុកតាំងគោក ខេត្តកំពង់ធំ លោកយាយវ័យចំណាស់ម្នាក់កំពុងតែលើកភ្លឺស្រែ ខ:ណ:មេឃកំពុងភ្លៀងលាយឡំនិងខ្យល់កន្រ្តាក់ផ្លេកបន្ទោលព្រាតៗ ត្រូវរន្ទះបាញ់ស្លាប់យ៉ាងអាណោចអធ័ម ។
សពឈ្មោះ សោម ឡាត់ ភេទស្រី អាយុ76ឆ្នាំ រស់នៅភូមិសេរីចំប៉ា ឃុំជ្រលង ស្រុកតាំងគោក ខេត្តកំពង់ធំ ។
សម្ថកិច្ចឲ្យដឹងថា ហេតុការណ៏នេះកើតឡើងនៅថ្ងៃទី15 ខែឧសភា ឆ្នាំ2021 វេលាម៉ោង 1:20នាទីរសៀល
តាមការបំភ្លឺពីសាក្សីឈ្មោះ យូ ថុល ភេទប្រុស អាយុ63 ឆ្នាំ នៅវេលាម៉ោង11:00នាទីព្រឹក ខ្លួនបានដឹកគោយកទៅឃ្វាល នៅតំបន់ចុងជំរៅភូមិកណ្ដាលចាស់ ស្ថិតក្ក្នុងភូមិសាស្រ្តភូមិសេរីចំប៉ា រួចហើយក៏ដើរទៅមើលស្រូវរបស់ខ្លួននៅម្ដុំស្រែរបស់គាត់ ក៏បានជួបហើយនិយាយលេងជាមួយលោកយាយឈ្មោះ សោម ឡាត់ ដែលកំពុងលើកភ្លឺស្រែ ពេលនោះមេឃកំពុងភ្លៀងរលឹមលាយឡំនិងផ្គរ និយាយរួចហើយខ្លួនក៏បានដើរចេញពីគាត់មកវិញបានប្រហែលជា50ម៉ែត្រ ស្រាប់តែរន្ទះបាញ់តែម្ដង ។ពេលនោះគាត់ក៏បានរត់ទៅលើកលោកយាយហើយជួយរឹតធ្វើចលនា ប៉ុន្តែគាត់បានស្លាប់បាត់ទៅហើយ។
ក្រោយទទួលបានពត៌មាន កម្លាំងជំនាញស្រុកសហការណ៍ជាមួយកម្លាំងជំនាញប៉ុស្ត៍ និងអាជ្ញាធរមួលដ្ឋានភូមិ ឃុំ ចុះពិនិត្យសព។
តាមការពិនិត្យកន្លែងកើតហេតុ និងសាកសពឃើញថាជនរងគ្រោះស្លាប់ដោយសាររន្ទះបាញ់ពិតប្រាកដមែន មិនមានពាក់ព័ន្ធនឹងបទល្មើសព្រហ្មទណ្ឌឡើយ។
ក្រោយពិនិត្យចប់ក៏បានប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី ៕
