ភ្នំពេញ៖ មានកម្មករជាង៤០០នាក់បានធ្វើដំណើរថ្មើរជើង មកពីរោងចក្រ “អេឃិនថេក” ដែលមានទីតាំងសួនឧស្សាហកម្មវឌ្ឍៈ ភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ គោលបំណងមកទាមទារលក្ខខណ្ឌ៩ចំណុចពីក្រុមហ៊ុន និងឲ្យក្រសួងការងារជួយដោះស្រាយអោយពួកគាត់ នៅព្រឹកថ្ងៃ១៤ខែកក្កដាឆ្នាំ២០១៥។
លក្ខខណ្ឌចំនួន៩ចំណុចរួមមាន៖ ១- នៅពេលកម្មករ កម្មការិនី សំរាលកូនសុំក្រុមហ៊ុនបើកប្រាក់ខែមុន៣ខែ២-សុំឲ្យក្រុមហ៊ុនពេលផ្តាច់កិច្ចសន្យា ត្រូវតែទូទាត់សំណងទៅតាមផ្លូវច្បាប់៥% ៣- សូមឲ្យក្រុមហ៊ុនមិនត្រូវ កាត់លុយក្នុងអំឡុងពេល ធ្វើកូដកម្មកន្លងមក ៤- សូមឲ្យក្រុមហ៊ុនដំឡើងប្រាក់ ធ្វើដំណើរបន្ថែមទៀតចំនួច៧ $ បន្ថែមលើប្រាក់ធ្វើដំណើរចាស់ ៥- សូមឲ្យក្រុមហ៊ុនបន្ថែមប្រាក់ថ្លៃបាយក្នុង១ថ្ងៃ២០០០រៀល ៦- សូមឲ្យក្រុមហ៊ុនបង្កលក្ខណ:ងាយស្រួល នៅពេលកម្មករដាក់ពាក្យសុំច្បាប់ ហើយពេលកម្មករ ឈឺមានសំបុត្រពេទ្យត្រឹមត្រូវ ក្រុមហ៊ុនមិនត្រូវកាត់ប្រាក់កម្មករជាដាច់ខាត ៧- សុំឲ្យក្រុមហ៊ុនមិនត្រូវរៀបចំ សហជីពជំនួសកម្មករ ដែលមិនបានចូលជាសមាជិក ហើយក្រុមហ៊ុនត្រូវធានាសិទ្ធិ ជូនកម្មករក្នុងការជ្រើសរើស សហជីពដែលខ្លួនពេញចិត្ត ៨- ក្រុមហ៊ុនមិនត្រូវបង្ខំកម្មករ ឲ្យថែមម៉ោងដោយមិនមែន ជាគោលការណ៍ស្ម័គ្រចិត្តនោះទេ ៩- ក្រុមហ៊ុនមិនត្រូវរើសអើងកម្មករ នៅពេលចូលជាសមាជិក សហជីពជាដាច់ខាត។
លើសពីនេះ ព្រឹកថ្ងៃដដែលនេះដែរកម្មករកម្មការនី មានគម្រោងដង្ហែក្បួនឆ្ពោះទៅក្រសួងការងារ និងបន្តទៅរដ្ឋសភាជាតិ ដើម្បីដាក់ញាតិឲ្យជួយដោះស្រាយជូនពួកគេផងដែរ ៕
