ខេត្តកោះកុង ៖ អាជ្ញាធរខេត្តកោះកុងរកឃើញបទល្មើសរំលោភដីរដ្ឋចំនួន០៣ទីតាំងទៀត បន្ទាប់ពីមានការបែកធ្លាយ ចេញពីប្រភពពលរដ្ឋ ។ បញ្ជាការឯកភាពខេត្តកោះកុង បាននាំកងកម្លាំងចម្រុះ ចុះពិនិត្យទិដ្ឋភាពជាក់ស្តែង លើបទល្មើសទន្ទ្រានកាន់កាប់ដីរដ្ឋចំនួន០៣ ទីតាំងនៅស្រុកស្រែអំបិល រួមមាន ៖
១. ទីតាំងដីស្ថិតនៅភូមិជ្រោយស្វាយខាងលិច ឃុំជ្រោយស្វាយ ស្រុកស្រែអំបិល ដែលស្ថិតនៅក្នុងតំបន់ប្រើប្រាស់ច្រើនយ៉ាងដងពែង។
២. ទីតាំងដីស្ថិតនៅឃុំជ្រោយស្វាយ (តំបន់សហគមន៍ត្រពាំងព្រិះ)។
៣. ទីតាំងដីស្ថិតនៅភូមិទឹកប៉ោ ឃុំបឹងព្រាវ ។
ក្នុងពេលចុះដឹកនាំកិច្ចការពិនិត្យទីតាំងដីរដ្ឋដែលត្រូវបានកាប់ទន្ទ្រានទាំង៣ទីតាំងនេះ លោក សុខ សុទ្ធី អភិបាលរងខេត្តបានណែនាំឱ្យអាជ្ញាធរដែនដីស្រាវជ្រាវរកឱ្យឃើញអ្នកទន្ទ្រានកាន់កាប់ដីរដ្ឋ និងមន្ទីរជំនាញចុះចុចយកនិយាមកាដីរដ្ឋដែលត្រូវបានទន្ទ្រានកាន់កាប់ដោយខុសច្បាប់ទាំងនោះ ដើម្បីធ្វើរបាយការណ៍ស្នើសុំចំណាត់ការ និងមតិ ពីថ្នាក់ដឹកនាំខេត្ត។
នៅ
ក្នុងប្រតិបត្តិការ នាថ្ងៃទី០៣ មេសា ២០២១ គេសង្កេតឃើញមាន មន្ទីរបរិស្ថាន មន្ទីររៀបចំដែនដី នគរូបនីយកម្ម សំណង់និងសុរិយោដី រដ្ឋបាលស្រុកស្រែអំបិល មេឃុំ មេភូមិ និងមានការចូលរួមសហការពីតំណាងអយ្យការអមសាលាដំបូងខេត្តកោះកុង ។
លោក អេង ចន្ទភារ៉ា ព្រះរាជអាជ្ញារង អមសាលាដំបូងខេត្តកោះកុង នៅរសៀលថ្ងៃទី០៣ មេសា ២០២១ លោកបានបញ្ជាក់ឲ្យសារព័ត៌មានដឹងផងដែរថា តាមការសន្និដ្ឋានបឋម ចំពោះបទល្មើសទន្ទ្រានកាន់កាប់ដីរដ្ឋចំនួន០៣ ទីតាំងខាងលើ ឃើញថា ត្រង់ចំណុចទីតាំងទឹកប៉ោង ពិតជាមានការឈូសឆាយជាក់ស្តែង ប្រមាណជា៥ហិកតា ចូលក្នុងតំបន់ប្រើប្រាស់ច្រើនយ៉ាងដងពែង ដោយឡែកពីរទីតាំងផ្សេងទៀត លោកនៅពុំអាចធ្វើការសន្នដ្ឋានបានទេ ដោយរងចាំខាងស្រុកនិងជំនាញធ្វើការវាស់វែង ចុចនិយាមការ ចេញរបាយការណ៍បញ្ជូនមកសិន ទើបអាចចាត់វិធានការតាមនីតិវិធីច្បាប់ទៅបាន។
ជាមួយគ្នានេះដែរ លោក សុខ សុទ្ធី អភិបាលរងខេត្តបានណែនាំឱ្យអាជ្ញាធរមូលដ្ឋាន សហការជាមួយមន្ទីរអង្គភាពជំនាញ ទប់ស្កាត់ តាមដាន ត្រួតពិនិត្យ និងចាត់វិធានការឱ្យបានម៉ឺងម៉ាត់ចំពោះការទន្ទ្រានកាន់កាប់ដីរដ្ឋដោយខុសច្បាប់ កុំឲ្យកើតមានឡើងបន្តទៀត៕
