ប្រភពពត៌មានពី មន្ត្រីជំនាញរដ្ឋបាលព្រៃឈើស្ទោង បានឲ្យដឹងថា ! នៅវេលាម៉ោង១១.០០នាទីយប់ ថ្ងៃទី១០ខែឧសភា ឆ្នាំ២០១៤ បន្ទាប់ពីទទួលបានពត៌មាន មកថា មានរថយន្តកាមរី ដឹកឈើប្រណិត១គ្រឿង ពណ៌ស្លែសេរី៩៥ ពាក់ផ្លាកលេខក្រចេះ2A0024 និងរថយន្តកាមរី(បាឡែន)១គ្រឿងទៀត ពាក់ផ្លាកលេខ កំពង់ធំ 2A0989 សំរាប់បិទគូទកំពុងតែធ្វើចរាចរណ៏ចេញមកពីខេត្តព្រះវិហារ ឆ្លងកាត់ខេត្តកំពង់ធំ ពេលនោះ កំលាំងផ្នែករដ្ឋបាលព្រៃឈើស្ទោង សហការគ្នាជាមួយកងរាជអាវុធហត្ថខេត្ត កំលាំងសឹករងកំពង់ធំ ដឹកនាំដោយ លោក សាយ ណូរ៉ា ព្រះរាជអាជ្ញារងខេត្ត ដោយមានការអនុញ្ញាត ពីលោក អ៊ិត សុធា ព្រះរាជអាជ្ញាអមសាលាតំបូង ខេត្ត កំពង់ធំផងនោះ កំលាំងរបស់យើងបានចុះទៅ ដល់ឃាត់ បានរថយន្ត ខាងលើ និងម្ចាស់ផ្ទះឈ្មោះ ធឿន វ៉ា ភេទស្រីអាយុ៥១ឆ្នាំ រស់នៅភូមិពុកយុក សង្កាត់ស្រយ៉ូវ ក្រុងស្ទឹងសែន ព្រមជាមួយបុរស ម្នាក់ទៀតឈ្មោះ ហឹង សារឹម ភេទប្រុសអាយុ៣០ ជាមន្ត្រីកងរាជអាវុធហត្ថក្រុងស្ទឹងសែន ។
ពាក់ព័ន្ធទៅនឹងរឿងឃាត់ខ្លួន ម្ចាស់ផ្ទះខាងលើ និងមន្ត្រីកងរាជអាវុធហត្ថក្រុងស្ទឹងសែននេះដែរ ប្រភពពត៌មានពីសមត្ថកិច្ចប្រាប់ថា នៅយប់ថ្ងៃកើតហេតុ សមត្ថកិច្ចកំពុងតែតាមប្រម៉ាញ់រថយន្តល្មើសទាំង២គ្រឿង ពេលនោះរថយន្តល្មើសបានបើកចូលទៅផ្ទះស្ត្រីឈ្មោះ ធឿន វ៉ា រួចអ្នកបើកបរបើក ទ្វាររត់គេច ខ្លួន បាត់ ដោយទុករថយន្តនៅទីនោះ !នេះបានចំជារកអុសប្រទះនិងចង្ក្រានហ្គែសមែន! ព្រោះនៅក្នុង របងផ្ទះ ស្ត្រីឈ្មោះ ធឿន វ៉ា សមត្ថកិច្ចបានប្រទះឃើញ គំនរឈើប្រណិតចំនួន៧១ដុំខុសច្បាប់ ហើយលោកព្រះរាជ អាជ្ញាក៏បញ្ជាឲ្យលើកដាក់លើរថយន្តរបស់សមត្ថកិច្ច !។
នៅពេលដែលសមត្ថកិច្ចកំពុងតែបំពេញភារកិច្ច ស្រាប់តែលេចមុខ មន្ត្រីកងរាជអាវុធហត្ថក្រុងស្ទឹងសែន ឈ្មោះ ហឹង សារឹម ជិះម៉ូតូទៅដល់ ហើយឡើងកាច់ សោរ ថយន្ត បញ្ឆេះ ក៏ត្រូវបានលោកព្រះរាជអាជ្ញាបញ្ជាឲ្យចាប់វាយខ្មោះតែម្តងទៅ ពីបទមានបំណងអុកឡុក ដល់សមត្ថកិច្ចអនុវត្តច្បាប់ ! ដោយនាំយក រថយន្តទាំង ២ គ្រឿង មកកាន់ផ្នែករដ្ឋបាលព្រៃឈើស្ទោង ធ្វើការវាស់ វែង នៅក្នុងរថយន្តកាមរីគូទហើមពណ៌ស្លែមានឈើប្រណិត ប្រភេទនាងនួនចំនួន ៣៧ ដុំ ស្មើនិង០,៥៨៩ ម៉ែត្រគូប ចំណែកឈើដែលរឹបអូសពីផ្ទះស្រី្តឈ្មោះ ធឿន វ៉ា ប្រភេទនាងនួនចំនួន៧១ដុំ ស្មើនិង០,៨៩១ ម៉ែត្រគូប សរុបស្មើ ១,៤៨០ ម៉ែត្រគូប ដើម្បីចាត់ការ ទៅតាមផ្លូវច្បាប់!
រីឯមន្ត្រីកងរាជអាវុធ ហត្ថក្រុងស្ទឹងសែនឈ្មោះ ហឹង សារឹម ប្រាប់ថា នៅយប់ថ្ងៃកើតហេតុ ខ្លួនស្រវឹងស្រាជោគជាំ បានជិះម៉ូតូទៅផ្ទះរបស់ខ្លួន ដែលមានចំងាយប្រហែល ៥០០ ម ពីកន្លែងកើតហេតុ ឃើញមានមនុស្សជុំៗគ្នា ខ្លួនក៏ចូលទៅមើល ហើយក៏រពិសដៃកាច់សោរថយន្តដឹកឈើនោះ ក៏ត្រូវគេចាប់វាយខ្នោះតែម្តងទៅ ! ។
ពាក់ព័ន្ធនិងបញ្ហាខាងលើនេះដែរ លោក ហែម សំអាង មេបញ្ជាការកងរាជអាវុធហត្ថក្រុងស្ទឺងសែនប្រាប់ថា ក្នុងនាមលោកជាមេរបស់គេ គ្រាន់តែដឹងថា កូនចៅវាស្រវឹងស្រា នៅពេលដែលសមត្ថកិច្ច ចុះចាប់រថយន្តដឹកឈើ មិនដឹងជាហេតុអី បានទៅកាច់សោរបញ្ឆេះរថយន្តរបស់គេ យ៉ាងដូច្នេះ ! វាជាកំហុសរបស់បុគ្គល អ្នកណាប្រព្រឹត្ត អ្នកនោះ ជាអ្នកទទួលខុសត្រូវចំពោះមុខច្បាប់ មិនមានពាក់ព័ន្ធអ្វីជាមួយនឹងអង្គភាពនោះទេ! ៕
ដោយ សុផាត
