អន្តរជាតិ ៖ កំពូលអ្នកប្រដាល់អន្តរជាតិ និងជាសមាជិកព្រឹទ្ធសភា លោក ម៉ានី ប៉ាក់គីអៅ ត្រូវបានជ្រើសរើសឱ្យក្លាយជាប្រធានគណបក្សកាន់អំណាច (PDP-Laban) ស្របពេលដែលមានសេចក្ដីរាយការណ៍ថា លោកនឹងឈរឈ្មោះបោះឆ្នោតនៅឆ្នាំ២០២២ ដើម្បីក្លាយជាប្រធានាធិបតីហ្វីលីពីន។
លោក Ron Munsayac នាយប្រតិបត្តិនៃគណបក្ស PDP-Laban បានបញ្ជាក់ថា លោក ប៉ាក់គីអៅ បានក្លាយជាប្រធានបក្ស កាលពីយប់ថ្ងៃពុធ ទី០២ ខែធ្នូ ឆ្នាំ២០២០។ ប៉ាក់គីអៅ បានស្បថចូលកាន់តំណែងថ្មី នៅក្នុងព្រឹត្តិការណ៍ដែលរៀបចំដោយគណបក្ស PDP-Laban នៅទីក្រុង Quezon។ អាណត្តិរយៈពេល៦ឆ្នាំក្នុងតំណែងជាសមាជិកព្រឹទ្ធសភារបស់ ប៉ាក់គីអៅ នឹងត្រូវបញ្ចប់នៅឆ្នាំ២០២២ ដូច្នេះ គាត់អាចឈរឈ្មោះក្នុងអាណត្តិថ្មី ឬឈរឈ្មោះប្រជែងតំណែងកាន់តែធំជាងមុន។
ទោះបីជាអ្នកវិភាគជាច្រើននៅហ្វីលីពីន បានលើកឡើងថា លោក Manny Pacquiao ទំនងជាកំពុងឈានទៅរកតំណែង ជាប្រធានាធិបតិអាណត្តិថ្មីក្តី ក៏លោក Pacquiao ផ្ទាល់បានបកស្រាយថា «វាលឿនពេកហើយដែលត្រូវមកនិយាយ អំពីការបោះឆ្នោតប្រធានាធិបតីនោះ»៕
