អន្តរជាតិ ៖ គណៈកម្មាធិការគ្រប់គ្រងគ្រោះមហន្តរាយបាននិយាយនៅថ្ងៃនេះថា ទឹកជំនន់និងការបាក់ដីនិងគ្រោះថ្នាក់ពាក់ព័ន្ធផ្សេងៗទៀត ដែលបង្កឡើងដោយព្យុះ និងជំនន់ទឹកភ្លៀង បានសម្លាប់មនុស្សយ៉ាងហោចណាស់ ១១៧នាក់ ខណៈ ២១នាក់ទៀតបន្តបាត់ខ្លួន នៅតំបន់ខ្ពង់រាបភាគកណ្តាលប្រទេសវៀតណាមចាប់តាំងពីដើមខែតុលា។ នេះបើយោងតាមប្រភពពីសារព័ត៌មាន CGTN។
យោងតាមរបាយការណ៍ចុងក្រោយរបស់គណៈកម្មាធិការបានឱ្យដឹងថាក្នុងចំណោមមនុស្សស្លាប់ភាគច្រើន ត្រូវបានរាយការណ៍ចេញពីបណ្ដាខេត្តភាគកណ្ដាលដូចជាខេត្ត Quang Tri, Thua Thien Hue និង Quang Nam។
គិតត្រឹមថ្ងៃព្រហស្បតិ៍សប្តាហ៍នេះ ផ្ទះប្រជាជនប្រមាណជា ៣៧,៥០០ខ្នង នៅក្នុងខេត្ត Quang Binh និង Quang Tri ត្រូវបានទឹកជន់លិច ខណៈប្រជាជនប្រហែល២០៦.៨០០នាក់ស្មើនឹង៥៩.៣០០ គ្រួសារនៅតាមតំបន់នានានៃខេត្ត Ha Tinh, Quang Binh និង Quang Tri ត្រូវបានជម្លៀសចេញ។
យ៉ាងណាមិញមជ្ឈមណ្ឌលជាតិព្យាករណ៍ឧតុនិយមបាននិយាយថាហានិភ័យខ្ពស់នៃការបាក់ដីនិងជំនន់ទឹកភ្លៀងអាចបន្តគំរាមកំហែងដល់តំបន់ជាច្រើនក្នុងខេត្ត Ha Tinh, Quang Binh, Quang Tri និង Thua Thien Hue ៕
