ខេត្តឧត្តរមានជ័យ ៖ ស្រុកត្រពាំងប្រាសាទ និងស្រុកអន្លង់វែង ខេត្តឧត្តរមានជ័យ កំពុងទទួលរងនូវការ រិះគន់គ្រប់មជ្ឈដ្ឋាន ដោយមានការកើតឡើងនូវសកម្មភាព ល្បែងឆ្នោតកន្ទុយលេខគ្រប់ទីកន្លែង ដែលជា បញ្ហាមួយធ្វើឲ្យ សមត្ថកិច្ច ជំនាញមានការពិបាកនៅក្នុងការបង្ក្រាប ព្រោះ គេដឹងថា មេឆ្នោតកន្ទុយលេខទាំងនោះជាអ្នកមានមុខមាត់ និង មានអំណាចទៀតផង ។
មេឆ្នោតធំៗ ជាច្រើននាក់ ក្នុងស្រុកទាំងពីរនោះ ត្រូវគេស្គាល់ថា មានឈ្មោះ ចូច ជាមន្ត្រីយោធា នៅក្នុងអង្គភាពកងពលធំលេខ២ និងជាមេកន្ទុយលេខធំបានដាក់កូនកញ្ច្រែងកន្ទុយលេខច្រើនជាងគេប្រចាំ ស្រុកអន្លង់វែង ទី២ ជា មេធម្មតាមានឈ្មោះថា ចែ បាន់យ៉ា បានដាក់ទូចាំទទួលកូនកញ្ច្រែងឆ្នោតនៅផ្ទះរបស់ខ្លួន ក្នុងភូមិប្រាំបួន.ប៉ែត ទី៣ឈ្មោះ តាវ៉ែនតា ដែលមានទីតាំងនៅជាប់ផ្ទះសំណាក់ត្រពាំងប្រិយ៏ ឃុំត្រពាំងប្រីយ៍ និងមេឆ្នោត តូចៗ ជាច្រើន ទៀត ដែលមានទីតាំងស្ថិតនៅផ្សារចាស់ នៅក្នុងឃុំថ្លាត នៅភូមិដីថ្មី-អណ្តូងបី ទី៤ ឈ្មោះថា ចែ ភាព និងមាន ទីតាំងមួយ កន្លែងទៀត នៅជាប់នៅមាត់ច្រកអន្តរជាតិជាំសាង៉ាំ ព្រំដែនកម្ពុជា – ថៃ ស្ថិតនៅ ក្នុងស្រុកអន្លង់វែងផងដែរ ។
ចំណែកនៅក្នុងទឹកដីស្រុកត្រពាំង ប្រាសាទ វិញ កន្លងមក មេឆ្នោតទាំងអស់ ត្រូវបាន អាជ្ញាធរ ក៏ដូចជាសមត្ថកិច្ចបានធ្វើកិច្ចសន្យាបញ្ឈប់រួចរាល់អស់ហើយ ប៉ុន្តែនៅមានមេឆ្នោតកន្ទុយលេខដុះស្លែរម្នាក់ទៀតឈ្មោះ ឃី ដែល កំពុងដំណើរការយ៉ាង រលូន នៃអាជីវកម្មឆ្នោត របស់ខ្លួន ដោយគ្មានញញើតសមត្ថកិច្ចជំនាញមួយណាឡើយ ។ តាមការបញ្ជាក់ពីមន្ត្រីជំនាញបានឲ្យដឹងថា មេឆ្នោតកន្ទុយលេខ វាមានការលំបាក ក្នុងការលុបបំបាត់ ដោយមេឆ្នោត ចាស់ៗមួយចំនួនត្រូវបានអាជ្ញាធរ និងសមត្ថកិច្ចស្រុក បានធ្វើកិច្ចសន្យាបញ្ឈប់មិនឲ្យបន្តនូវសកម្មភាពរបស់ខ្លួនទៀតឡើយ ។ ដោយឡែក ការកើនឡើងមេឆ្នោតថ្មីជាច្រើននេះ សុទ្ធសឹងជាអ្នកមានលុយ និងមានអំណាចទៀតផង ។
ប្រភពប្រជាពលរដ្ឋបានឲ្យដឹងថា ការលេងល្បែងឆ្នោតកន្ទុយលេខជារឿងធម្មតា ព្រោះថាទីកន្លែងណាក៍មានដែរ ចំពោះមេឆ្នោតទាំងអស់ខាងលើ បានពង្រាយកូនកញ្ច្រែងរបស់ខ្លួនជាច្រើននាក់ដើម្បីដើរកត់លេខឆ្នោតគ្រប់កន្លែង នៅក្នុងស្រុកអន្ល់វែង ក៏ដូចជាស្រុកត្រពាំងប្រាសាទ សូម្បីតែនៅតាម បណ្តាភូមិ ដាច់ស្រយ៉ាលក៍មានផងដែរ ៕
ប៊ុនធឿន
