រាជធានីភ្នំពេញ ៖ សម្តេច ហ៊ុន សែន នាយករដ្ឋមន្ត្រីកម្ពុជា នៅពេលនេះ កំពុងតែធ្វើដំណើរទៅកាន់ខេត្តបន្ទាយមានជ័យ ដើម្បីចុះសួរសុខទុក្ខ និងនាំយកជំនួយឧបត្ថម្ភជូនប្រជាពលរដ្ឋប្រមាណ២ម៉ឺនគ្រួសារ ដែលរងគ្រោះដោយទឹកជំនន់ទឹកភ្លៀង ។ សម្តេច ហ៊ុន សែន នឹងស្នាក់នៅខេត្តបន្ទាយមានជ័យ រយៈពេល២ថ្ងៃ គឺថ្ងៃ២១ និងថ្ងៃ២២ ខែតុលា ។
សម្តេច ហ៊ុន សែន បានបង្ហោះសារនៅក្នុងហ្វេសបុកផ្លូវការនាព្រឹកថ្ងៃទី២០ខែតុលានេះថា៖«ពេលនេះខ្ញុំកំពុងធ្វើដំណើរទៅកាន់ខេត្តបន្ទាយមានជ័យដើម្បីសួរសុខ ទុក្ខនិងជួយឧបត្ថម្ភប្រជាជនប្រមាណពីរម៉ឺនគ្រួសារដែលរងគ្រោះដោយជំនន់ទឹកភ្លៀង ។ខ្ញុំនឹងបំពេញការងារពីរថ្ងៃនៅខេត្តបន្ទាយមានជ័យ គឺថ្ងៃ២១និងថ្ងៃ២២ខែតុលា ឆ្នាំ២០២០ មុននឹងត្រឡប់មកភ្នំពេញវិញដើម្បីដឹកនាំការប្រជុំគណៈរដ្ឋមន្ត្រីនៅថ្ងៃ២៣ខែតុលាឆ្នាំ២០២០»។សម្តេចតេជោ ហ៊ុនសែន បានបន្តទៀតថា៖«ខេត្តបន្ទាយមានជ័យជាខេត្តដែលរងគ្រោះធ្ងន់ជាងគេនិងយូរជាងគេដែលចាំបាច់ត្រូវផ្តល់អាទិភាពសង្គ្រោះផងនិងស្តារឡើងវិញក្រោយទឹកជំនន់ផង »។
សូមអរគុណសប្បុរសជនដែលជួយផ្តល់ជាថវិកា សម្ភារ ស្បៀងអាហារ ។ល។ តាមរយ:រាជរដ្ឋាភិបាលឬកាកបាទក្រហមឬអាជ្ញាធរថ្នាក់ក្រោមជាតិឬចុះចែកផ្ទាល់ដល់ ប្រជាជនដែលរងគ្រោះ។សូមកោតសរសើរចំពោះស្ថាបន័ថ្នាក់ជាតិនិងអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ព្រះសង្ឃ ក្រុមយុវជនទាំងអស់ដែលបានចូលរួមជួយសង្គ្រោះប្រជាជននៅតំបន់រងគ្រោះ ដែលនេះបានបង្ហាញនូវកម្លាំងសាមគ្គីភាពដ៏រឹងមាំនិងទូលំទូលាយនៃជាតិយើង ។ សូមជូនពរបងប្អូនជនរួមជាតិជួបតែសេចក្តីសុខ៕
