ខេត្តឧត្តរមានជ័យ ៖ នៅរសៀលថ្ងៃទី១៤ ខែមិថុនា ឆ្នាំ២០១៥ នៅទីបញ្ជាការរដ្ឋានកងពលតូចថ្មើរជើងលេខ៤១ ឯកឧត្តមនាយ ឧត្តមសេនីយ៍ គន់ គីម អគ្គមេបញ្ជាការរង – នាយ សេនា ធិការចម្រុះនៃកងយោធពលខេរៈភូមិន្ទ និងជាអនុប្រធាន ទី១ គណបញ្ជាការឯកភាពសមរភូមិមុខព្រំដែនកម្ពុជា-ថៃ និងប្រតិភូ យោធា ជាន់ខ្ពស់ជាច្រើនរូបទៀត ព្រមទាំង កងទ័ពសមរភូមិមុខ នៃទិសយោធភូមិភាគទី៤ និងមន្ត្រីរាជការស៊ីវិល រួមគ្នាជាមួយអាជ្ញាធរមូលដ្ឋាន ប្រមាណ ជាង ៨០០ រូប ស្ថិតក្នុងភូមិសាស្ត្រស្រុកអន្លង់វែង ( ខេត្តឧត្តរ មាន ជ័យ ) ដើម្បីប្រារព្ធធ្វើពិធីគោរពវិញ្ញាណខ័ន្ធ កាន់មរណទុក្ខ សូត្រមន្ត ឧទ្ទិសមហាកុសល ជូនទៅដល់ដួង ព្រលឹង នៃសព សម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជា ស៊ីម ប្រធាន ព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ដែលបានធ្វើមរណកាល លាចាកលោក យើងនេះកាលពីថ្ងៃទី០៨ ខែមិថុនា ឆ្នាំ២០១៥ នៅវេលាម៉ោង ១៥ និង ៤៥ នាទី ក្នុងជន្មាយុ ៨៣ ឆ្នាំ ដោយ រោគាជរាពាធ ។
គុណូបការៈពីថ្ងៃ ០៧ មករា ១៩៧៩ រហូតមកដល់ពេលនេះ ប្រជាពលរដ្ឋកម្ពុជាមិនអាចបំភ្លេចបានទេ ថ្ងៃកំណើត រណសិរ្សសាមគ្គីសង្គ្រោះជាតិកម្ពុជា ( ថ្ងៃ០២ ធ្នូ ១៩៧៨ ) ដែលជាថ្ងៃកំរើកឡើងនូវចលនាតស៊ូ រំដោះ ជាតិ និងប្រជាជន ចេញពីភពខ្មៅងងិត នៃរបបប្រល័យពូជសាសន៍(ប៉ុលពត) ។ គឺជាប្រវត្តិសាស្ត្រ នៃការនាំមកនូវកំណើតទី២ របស់ប្រជាជាតិកម្ពុជា ដែលមានសម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជា ស៊ីម ជាប្រធានដឹកនាំ ។ គឺជាការចងចាំដោយបានចារឹកទុកក្នុងដួងចិត្ត នៃប្រជាពលរដ្ឋកម្ពុជាគ្រប់ៗរូប មាន ការសោកស្តាយយ៉ាងខ្លាំង គឺនៅពេល ដែលសម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជា ស៊ីម បានឃ្លាតឆ្ងាយពីប្រជាពលរដ្ឋកម្ពុជា ដោយគ្មានថ្ងៃវិលត្រឡប់វិញនោះ ។
មរណភាពរបស់សម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជាស៊ីម គឺជាការបាត់បង់យ៉ាងធំធេង មិនថា ចំពោះ ក្រុមគ្រួសារប៉ុណ្ណោះរបស់សម្តេចនោះទេ តែវាជាការបាត់បង់ថ្នាក់ដឹកនាំកំពូលមួយរូបនៃកម្ពុជា និងជាការ បាត់បង់វីរជនខ្មែរ ដ៏ឆ្នើមម្នាក់ ជាការបាត់បង់ពុទ្ធសាសនូបត្ថម្ភដ៏សកម្ម និងជាការបាត់បង់មនុស្សជាទីគោរពស្រឡាញ់ នៃប្រជាជន កម្ពុជាផងដែរ ដែលពេញមួយជីវិតរបស់សម្តេច បានធ្វើមហាពលីកម្មគ្រប់បែបយ៉ាង ក្នុងបុព្វហេតុរំដោះជាតិ ការពារជាតិ បង្រួប បង្រួមជាតិ ស្វែងរកសន្តិភាព ដើម្បីនាវាកម្ពុជា ធ្វើដំណើរឆ្ពោះទៅរកការអភិវឌ្ឍន៍សង្គម លើគ្រប់វិស័យ ៕
ប៊ុនធឿន
