រាជធានីភ្នំពេញ ៖ គិតត្រឹមរសៀល ថ្ងៃទី១៦ ខែតុលា ឆ្នាំ២០២០នេះ អាជ្ញាធររាជធានីភ្នំពេញបាន ជួយសង្គ្រោះប្រជាពលរដ្ឋ ជាង ៥ពាន់គ្រួសារហើយ ដែលរងគ្រោះដោយទឹកជំនន់បញ្ជូនមកកាន់ទីទួលសុវត្ថិភាព ។ ចំណែកការសង្គ្រោះកាលពីព្រឹកមិញនេះធ្វើនៅក្នុងខណ្ឌកំបូល ខណ្ឌពោធិ៍សែនជ័យ និងខណ្ឌដង្កោ ដែលរងគ្រោះធ្ងន់ធ្ងរជាងគេ។ នេះបើយោងតាមការឲ្យដឹងពីលោក ឃួង ស្រេង អភិបាលរាជធានីភ្នំពេញ ។
លោកអភិបាលរាជធានីភ្នំពេញបានបញ្ជាក់បន្ថែមថា រដ្ឋបាលរាជធានីបានរៀបចំទីទួលសុវត្ថិាពសម្រាប់ប្រជាពលរដ្ឋរួចហើយ ដែលមាន៤ទីតាំងដូចជា ទីតាំងទី១នៅសង្កាត់សាក់សំពៅ ទីតាំងទី២ នៅសង្កាត់រលួស ទីតាំងទី៣ នៅសង្កាត់គងនយ និងទីតាំងទី៤ នៅតំបន់ស្ពានព្រែកជ្រៃតែម្តង។
លោក ឃួង ស្រេង ក៏បានអះអាងដែរថា ក្រៅពីការជួយជម្លៀសប្រជាពលរដ្ឋរងគ្រោះមកកាន់ទីទួលសុវត្ថិភាពនោះហើយ រដ្ឋបាលរាជធានីក៏បានរៀបចំការផ្គត់ផ្គង់ស្បៀងអាហារជូនដល់ប្រជាពលរដ្ឋកំពុងរងគ្រោះជារៀងរាល់ថ្ងៃផងដែរ ៕
