ខេត្តកណ្តាល ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃនេះបានថ្លែង នូវការកោតសរសើរ ចំពោះប្រជាពលរដ្ឋកម្ពុជាភាគច្រើន ដែលមិន លុះជឿតាមពាក្យញុះញង់ បង្កអសន្តិសុខរបស់ក្រុមឧក្រិដ្ឋជនទាំងក្នុងនិងក្រៅប្រទេស ។ ការលើកឡើងរបស់សម្តេចតេជោ ហ៊ុន សែន បានធ្វើឡើង ក្នុងពិធីសម្ពោធមជ្ឈមណ្ឌលកម្សាន្តខ្នាតយក្សនៅកម្ពុជា «ព្រីនស៍ ម៉ាណ័រ» នៅស្រុកកៀនស្វាយ ខេត្តកណ្តាល នាព្រឹកថ្ងៃទី០៧ ខែតុលា ឆ្នាំ២០២០នេះ។
សម្តេច ហ៊ុន សែន បានថ្លែងថា សម្តេចអរគុណចំពោះប្រជាពលរដ្ឋកម្ពុជាជាង១៦លាននាក់ ដែលបានចូលរួមក្នុងការ ថែរក្សាសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់សង្គមដោយមិនលុះតាមការញុះញង់របស់ ពួកឧក្រិដ្ឋជនពីខាងក្រៅនិងខាងក្នុង ។
សម្តេចសង្កត់ធ្ងន់ថា ដោយសារតែមានប្រជាពលរដ្ឋចូលរួមច្រើនកុះករនោះហើយទើបបានជាយើងរៀប ចំបុណ្យភ្ជុំបិណ្ឌប្រកបដោយសន្តិភាព យើងនាំគ្នាដើរលេងប្រកបដោយសន្តិភាព ហើយអ្វីទាំងអស់នោះ គឺកើតចេញពីកត្តាសន្តិភាព នយោបាយសុខសន្តិភាពនោះឯង ។ សម្តេចក៏អំពាវនាវឲ្យប្រជាពលរដ្ឋបន្តរួមគ្នាថែរក្សា សុខសន្តិភាពឲ្យបានគង់វង្ស ៕