រាជធានីភ្នំពេញ ៖ តាមព័ត៌មានទទួលបានពីតុលាការ សំណុំរឿងលោក ថ្លាង ភិនរ៉ា ពាក់ព័ន្ធនឹងការជេរប្រមាថ គំរាមបាញ់សម្លាប់ម្ចាស់ហាងអង្គរជុំ និងភរិយា ដែលបានប្រពឹ្រត្តកាលពីវេលាថ្ងៃត្រង់ទី២០ ខែកញ្ញា ឆ្នាំ២០២០កន្លងទៅនេះ កំពុងត្រូវបានតុលាការបើកការស៊ើបអង្កេតតាមពាក្យបណ្តឹងរបស់ជនរងគ្រោះ ។
សូមជម្រាបថា ជនរងគ្រោះដែលជាម្ចាស់ហាងគុយទាវអង្គរជុំ បានដាក់ពាក្យប្តឹងប្រធានការិយាល័យប្រឆាំងភេរវកម្ម នៃក្រសួងមហាផ្ទៃ ឈ្មោះ ថ្លាង ភិនរ៉ា បន្ទាប់ពីមន្ត្រីនគរបាលរូបនេះ បានដកកាំភ្លើងគំរាមបាញ់សម្លាប់លោក និងភរិយា។ ហេតុការណ៍ខាងលើ បានកើតឡើងនៅវេលាម៉ោង១២ថ្ងៃត្រង់ ថ្ងៃទី២០ ខែកញ្ញា ឆ្នាំ២០២០កន្លងទៅ ។
តាមពាក្យបណ្តឹងជនរងគ្រោះឈ្មោះ ជុយ សុខហេង ភេទប្រុស អាយុ៥៣ឆ្នាំ ទីលំនៅសព្វថ្ងៃផ្ទះលេខ៩១ ផ្លូវ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ ជាម្ចាស់ហាងគុយទាវអង្គរជុំសាខាទួលគោក បានប្ដឹងលោក ថ្លាង ភិនរ៉ា ទៅកាន់ស្ថាប័នចំនួន៣៖
*ទី១៖ ប្តឹងទៅកាន់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ
*ទី២៖ ប្តឹងទៅអយ្យការអមសាលាដំបូងរាជធានីភ្នំពេញ
*ទី៣៖ ប្តឹងទៅកាន់គណៈមេធាវីនៃព្រះរាជាណាចក្រកម្ពុជា។
ជនរងគ្រោះក៏បានទាមទារសំណងជំងឺចិត្ត ១០ម៉ឺនដុល្លារអាមេរិក និងបានស្នើសូមឲ្យច្បាប់ផ្តន្ទាទោសលើមន្ត្រីនគរបាលនោះធ្ងន់ធ្ងរជាទីបំផុត មិនអាចលើកលែងបាន។ នេះបើយោងតាមពាក្យបណ្តឹងរបស់ជនរងគ្រោះដែលបានដាក់ប្តឹងទៅតុលាការរាជធានីភ្នំពេញ ៕