ខេត្តកំពង់ឆ្នាំង ៖ កម្លាំងសមត្ថកិច្ចចម្រុះ និងមន្ត្រីគយស្នាក់ការសាខាខេត្តកំពង់ឆ្នាំង រយៈពេល១ថ្ងៃ (ព្រឹកល្ងាច) គឺនៅថ្ងៃទី
២១ ខែកញ្ញា ឆ្នាំ២០២០ បានធ្វើសកម្មភាពឆែកឆេររថយន្តដឹកទំនិញធុនធ្ងន់២គ្រឿង បានពាក់ស្លាកដូចគ្នា (រថយន្តសឺមីរ៉ឺម៉ក) ហើយត្រូវបានសមត្ថកិច្ចស្ទាក់ចាប់បានកាលពីប៉ុន្មានថ្ងៃមុន ដោយសង្ស័យមានដឹកទំនិញគេចពន្ឋ ហើយពាក់ស្លាកលេខក្លែងក្លាយ ដើម្បីបំភ័ន្តភ្នែកសមត្ថកិច្ច ។ទោះជាយ៉ាងនេះក្តី សកម្មភាពត្រួតពិនិត្យលើរថយន្តទាំង២គ្រឿងខាងលើ មន្ត្រីសាខាគយខេត្តកំពង់ឆ្នាំង មិនអនុញ្ញាត្តិឱ្យអ្នកសារព័ត៌មានយើងចូលថតយករូបភាព និងយកព័ត៌មានឡើយ ។
លោក ជិត សុផាត នាយការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាន នគរបាលខេត្តកំពង់ឆ្នាំង នៅរសៀលថ្ងៃទី២១ ខែកញ្ញា នេះថា៖ រថយន្តទាំង២គ្រឿងនេះ សមត្ថកិច្ចនគរបាល បានឃាត់ទុកតាំងពីថ្ងៃទី១៤ ខែកញ្ញា មកម្លេះ គឺតាមបញ្ជារលោកព្រះរាជអាជ្ញា ។ ក្នុងនោះរថយន្តទី១.ក្បាល រថយន្តម៉ាក HYUNDAI ពណ៌ទឹកប៊ិច ពាក់ស្លាកលេខ តាកែវ 3A-1438 កន្ទុយសណ្តោង ពាក់ផ្លាកលេខ ភ្នំពេញ 4A-2487 បើកបរដោយឈ្មោះ ជឿន បូទុម ភេទ ប្រុស អាយុ ២៥ ឆ្នាំ បច្ចុប្បន្នរស់នៅភូមិស្នោរ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង ។
ទី២.ក្បាលរថយន្តម៉ាក FUSOពណ៌ស ពាក់ផ្លាកលេខ តា
កែវ 3A-14 38 (គឺស្លាកលេខដូចគ្នារថយន្តទី១ដែរ) មានសណ្តោងរ៉ឺម៉កពាក់ស្លាកលេខ ភ្នំពេញ 4A-00 81 បើកបរដោយឈ្មោះ សុខ ពៅ ភេទ ប្រុស អាយុ ៣៦ ឆ្នាំ រស់នៅភូមិបន្លាស្អិត សង្កាត់ឈ្មួញ ខណ្ឌសែនសុខ រាជធានីភ្នំពេញ ។ រថយន្តទាំ២គ្រឿងនេះ ជាកម្មសិទ្ធិរបស់ឈ្មោះ ធារី ភេទស្រី និងឈ្មោះ នឹត និងមានបិតឡូហ្គូដឹកជញ្ជូនរបស់ក្រុមហ៊ុនអក្សរ K ។ តាមការសហការត្រួតពិនិត្យប្រព័ន្ធទិន្នន័យ យានយន្តរបស់ក្រសួងសាធារណការ និងដឹកជញ្ជូន បានបញ្ជាក់ថា រថយន្តទាំង ០២ គ្រឿងនោះ គឺក្លែងស្លាកលេខ ហើយរថយន្តទាំង ០២ គ្រឿងនេះនឹងត្រូវប្រគល់អោយការិ
យាល័យនគរបាលចរាចរណ៍ផ្លូវគោករក្សាទុក ដើម្បីស្រាវ
ជ្រាវបន្តកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់ ។
