រាជធានីភ្នំពេញ ៖ ជិតភ្ជុំ មានរឿងអកុសល ខណដែលប្រជាពលរដ្ឋបានប្រទះឃើញលោកតាអាយុ៧៥ឆ្នាំម្នាក់ ត្រូវបានគេដឹកតាមរថយន្តពណ៌ខ្មៅមួយគ្រឿង មិនស្គាល់ម៉ាក និងស្លាកលេខជិះគ្នា៦នាក់ ប្រុស៣នាក់ ស្រី៣នាក់ យកគាត់មកទម្លាក់ចោលនៅលើបង់ ក្នុងសង្កាត់ព្រែកលៀប តាមផ្លូវជាតិ6A ។ ភ្លាមនោះមានការសង្ស័យថា ប្រហែលជាកូនរបស់គាត់បានដឹកយកមកទម្លាក់ចោលដូច្នេះ ។ ប្រជាពលរដ្ឋប្រទះឃើញលោកតាខាងលើនេះ កាលពីវេលាម៉ោង៧ព្រឹក ថ្ងៃទី១១ ខែកញ្ញា ឆ្នាំ២០២០ ស្ថិតតាមបណ្ដោយផ្លូវជាតិលេខ៦អា ចំណុចក្បែរស្ពានលេខ៣ ភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
លោកតាចំណាស់ និងមានជំងឺប្រចាំកាយខាងលើ ឈ្មោះ គិត ឈាង អាយុ៧៥ឆ្នាំ ស្នាក់នៅភូមិ អរិយក្សត្រ ឃុំអរិយក្សត្រ ស្រុកល្វាឯម ខេត្តកណ្ដាល។
តាមប្រភពព័ត៌មានពីស្ត្រីម្នាក់ជាប្រជាពលរដ្ឋនៅក្បែរកន្លែងកើតហេតុបានឲ្យដឹងថា កាលពីវេលាម៉ោង៧ព្រឹក ថ្ងៃទី១១ ខែកញ្ញា ឆ្នាំ២០២០ គាត់បានធ្វើដំណើរទៅទិញអីវ៉ាន់។ លុះធ្វើដំណើរមកដល់ចំណុចកើតហេតុ ស្រាប់តែឃើញរថយន្តពណ៌ខ្មៅមួយគ្រឿង មិនស្គាល់ម៉ាក និងស្លាកលេខ ជិះគ្នា៦នាក់ ប្រុស៣នាក់ ស្រី៣នាក់ យកលោកតាចេញពីរថយន្ត ឲ្យអង្គុយនៅបង់កន្លែងខាងលើ។
ប្រភពដដែលបន្តថា នៅពេលគាត់សួរនាំ ពួកគេឆ្លើយថា ប្រញាប់ដឹកអ្នកដំណើរទៅស្រុក ហើយក៏ប្រញាប់ចាកចេញពីបុរសវ័យចំណាស់នោះ នាំគ្នាឡើងរថយន្ត ឆ្ពោះទៅទិសខាងជើងបាត់ស្រមោលទៅ។
បើតាមប្រភពពីលោកតាវ័យចំណាស់ខាងលើបានឲ្យដឹងថា ក្នុងចំណោមអ្នកដែលទុកគាត់ចោលនោះ មានកូនស្រីរបស់គាត់ចំនួន២នាក់ផងដែរ។ តែលោកតាមិនបានប្រាប់ពីឈ្មោះពួកគេឡើយ។ លោកតាបន្តថា គាត់មានជំងឺរលាកក្រពះពោះវៀនកម្រិតធ្ងន់ ត្រូវចំណាយប្រាក់ហូតដល់ ៣ ០០០ដុល្លារ ក្នុងការវះកាត់ព្យាបាល តែគាត់គ្មានលទ្ធភាពទេ។ លោកតាបញ្ជាក់បន្ថែមថា គាត់ត្រូវកូនដេញចេញពីផ្ទះ តែមិនប្រាប់ថាកូនឈ្មោះអី ជាអ្នកដេញគាត់ចេញនោះទេ។
