ខេត្តកំពង់ឆ្នាំង ៖ នៅព្រឹកថ្ងៃទី 14 ខែសីហា ឆ្នាំ 2020 វេលាម៉ោង7.15នាទី មានករណីគ្រោះថ្នាក់ចរាចរណ៍ផ្លូវទឹកបណ្ដាលឲ្យបុរសម្នាក់បានស្លាប់យ៉ាងអាណោចអាធ័ម នៅចំណុចមាត់ច្រកដីដុស ស្ថិតក្នុងភូមិកណ្ដាល សង្កាត់ផ្សារឆ្នាំង រវាងកាណូតបាឡា(ស្មាច់)បុកនឹងកាណូតបាឡា(ស្មាច់) ។
ឧប្បត្តិហេតុគ្រោះថ្នាក់ចរាចរណ៍តាមផ្លូវទឹកបណ្ដាលឲ្យស្លាប់យុវជនម្នាក់ឈ្មោះ ប៉ិន ម៉ៅ ភេទប្រុស អាយុ23ឆ្នាំ មានទីលំនៅ ភូមិកំពង់បឹង ឃុំកំពង់ហាវ ស្រុកកំពង់លែង ក្នុងហេតុការណ៍ខាងលើខូចកាណូតបាឡា(ស្មាច់)ចំនួន02គ្រឿងផងដែរ។ ក្រោយកើតហេតុ កម្លាំងប៉ុស្តិ៍ ផ្សារឆ្នាំងសហការជាមួយកំលាំងការិយាល័យជំនាញបានឃាត់ខ្លួនអ្នកបើកបរកាណូតបាឡាស្មាច់ ដែលជាជនបង្កម្នាក់ឈ្មោះ ខុន សុជា ភេទ
ប្រុស អាយុ24ឆ្នាំ មានទីលំនៅភូមិកំពង់បឹង ឃុំកំពង់ហាវ ស្រុកកំពង់លែង ខេត្តកំពង់ឆ្នាំង។
បច្ចុប្បន្នជនសង្ស័យខាងលើត្រូវបានកម្លាំងសមត្ថកិច្ចជំនាញបញ្ជូនខ្លួនមកស្នងការនគរបាលខេត្តកំពង់ឆ្នាំង និង កសាងសំណុំរឿងដើម្បីចាត់ការតាមនីតិវិធី ។
ក្រោយពីសមត្ថកិច្ចបានត្រួតពិនិត្យនិងធ្វើកោសល្យវិច្ឆយ័រួច សាកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
