រាជធានីភ្នំពេញ ៖ ក្រសួងអប់រំ យុវជន និងកីឡា បានប្រកាសនៅថ្ងៃនេះថា ក្រសួងបានសម្រេចបើកឲ្យដំណើរការសិក្សាគ្រឹះស្ថានសាធារណៈ ( សាលារដ្ឋ ) ឡើងវិញដំណាក់កាលទី២នាខែកញ្ញាខាងមុខ ។ ប៉ុន្តែបើកតែសម្រាប់សិស្សថ្នាក់ទី៩ និងទី១២ប៉ុណ្ណោះ ដើម្បីត្រៀមប្រឡងយកសញ្ញាបត្រមធ្យមសិក្សាទាំង២កំរិត នៅអំឡុងខែធ្នូឆ្នាំនេះ ខណៈថ្នាក់ដទៃទៀត នឹងត្រូវជូនដំណឹងអំពីដំណើរការនៅពេលក្រោយទៀត។
ក្រសួងអប់រំបញ្ជាក់ថា ថ្នាក់ទី៩ និងថ្នាក់ទី១២ ដែលជាថ្នាក់ត្រូវប្រលងសញ្ញាបត្រមធ្យម សិក្សាបឋមភូមិ និងសញ្ញាបត្រមធ្យមសិក្សាទុតិយភូមិ(បាក់ឌុប) នៃគ្រឹះស្ថានអប់រំសាធារណៈ នឹងត្រូវអនុញ្ញាតឲ្យចូលរៀនមុនគេនៅអំឡុងខែកញ្ញាខាងមុខនេះ ។
តាមសេចក្តីប្រកាសព័ត៌មានរបស់ក្រសួងអប់រំគឺដំណើរការចូលរៀនឡើងវិញនេះ ធ្វើឡើង ក្នុងទ្រង់ទ្រាយតូច តែ១៥នាក់ក្នុងមួយថ្នាក់ប៉ុណ្ណោះ ដោយគោរពតាមវិធានអនាម័យរបស់ ក្រសួងសុខាភិបាល និងអង្គការសុខភាពពិភពលោក (WHO)។
ក្រសួងក៏បានឲ្យដឹងទៀតថា គ្រឹះស្ថានសិក្សាឯកជនមួយចំនួន ក៏បានស្ម័គ្រចិត្តពន្យាពេល ការប្រលងសញ្ញាបត្របាក់ឌុប រហូតដល់ខែធ្នូផងដែរ ដើម្បីចូលរួមប្រលងជាមួយសាលារដ្ឋ ខណៈសាលាឯកជនមួយចំនួនបានរៀបចំប្រលងដោយឡែក បន្ទាប់ពីពួកគេដំណើរ ការសិក្សាតាមអនឡាញ ៕
