រាជធានីភ្នំពេញ ៖ កាលពីយប់ថ្ងៃទី៥ ខែសីហា ឆ្នាំ២០២០ សាកសពស្ត្រីខ្មែរម្នាក់ដែលខ្មាន់កាំភ្លើងបាញ់សម្លាប់នៅក្នុងកន្លែងលេងល្បែស៊ីសងមួយកន្លែងស្ថិតនៅសង្កាត់ឆង់នុនស៊ី ខណ្ឌយ៉ានណាវ៉ា ទីក្រុងបាងកក ប្រទេសថៃ កាលពីយប់ថ្ងៃទី៣ខែសីហាឆ្នាំ២០២០ត្រូវបានដឹកបញ្ជូនមកដល់ច្រកព្រំដែនប៉ោយប៉ែតហើយកាលពីយប់ថ្ងៃទី៥ ខែសីហាឆ្នាំ២០២០នេះ។
លោក កុយ គួង អ្នកនាំពាក្យឲ្យក្រសួងការបរទេសបានថ្លែងប្រាប់អ្នកសារព័ត៌មានថា តាមព័ត៌មានទទួលបានពីស្ថានទូតកម្ពុជាប្រចាំប្រទេសថៃបញ្ជាក់ថា កាលពីវេលាម៉ោង ១០យប់ថ្ងៃទី៣ ខែសីហា ឆ្នាំ២០២០ មានហេតុការណ៍ផ្ទុះអាវុធបានកើតឡើងនៅក្នុងកន្លែងលេងល្បែស៊ីសងមួយនៅអាគារលេខ ៥០១/២៣៧ ផ្រាក់រ៉ាម ៣ សយ ៦៦ សង្កាត់ឆង់នុនស៊ី ខណ្ឌយ៉ាន ណាវ៉ា ទីក្រុងបាងកក ។ ក្នុងហេតុការណ៍នោះបណ្តាលឱ្យមានអ្នករងរបួសចំនួន ២នាក់និងស្លាប់ចំនួន ៤នាក់ដែលនៅក្នុងចំណោមអ្នកស្លាប់មានពលរដ្ឋខ្មែរម្នាក់ ឈ្មោះ ម៉ៅ ស្រីពៅ ភេទស្រី អាយុ២៩ឆ្នាំ មានទីលំនៅសង្កាត់ប៉ោយប៉ែត ខេត្តបន្ទាយមានជ័យ។
លោកបញ្ជាក់បន្ថែមថា រហូតមកដល់នេះស្ថានទូតកំពុងធ្វើការជាមួយអាជ្ញាធរថៃ ជាពិសេសជាមួយប៉ូលីសថៃ ហើយមន្ត្រីស្ថានទូតបានធ្វើដំណើរទៅកាន់កន្លែងតម្កល់សពចូលរួមសង្កេតការក្នុងការធ្វើកោសល្យវិច័យរកមូលហេតុនៅពីក្រោយការបាញ់សម្លាប់នេះ ៕
