រាជធានីភ្នំពេញ ៖ ក្រោយសម្តេចតេជោ ហ៊ុន សែន នាយករដ្ឋមន្ត្រីបានចេញបញ្ជាឲ្យកាត់ឆ្វៀលដី ជូនប្រជាពលរដ្ឋដែលកំពុងរស់នៅជាក់ស្តែងក្នុងតំបន់អភិរក្ស តំបន់សត្វព្រៃនិងតំបន់ការពារផ្សេងៗ ទៀតនោះ គេសង្កេតឃើញថា ជនឱកាសនិយមសំខាន់មន្ត្រីមានអំណាច អ្នកមានលុយមួយចំនួន កំពុងតែឆ្លៀតបន្លំតាមរូបភាពកន្ទេលធំបន្លំដេក ដើម្បីបន្លំយកដីក្នុងតំបន់ហាមឃាត់បង្កការរិះគន់និងថ្នាំងថ្នាក់ពីមន្ត្រីរាជការ រួមទាំងប្រជាពលរដ្ឋ ។
អាស្រ័យហេតុផលខាងលើនេះហើយ ទើបក្រសួងបរិស្ថានតាមរយៈហ្វេសប៊ុកផ្លូវការបាន បង្ហោះឡើងវិញនូវខ្លឹមសារនៃប្រសាសន៍របស់សម្តេច ហ៊ុន សែន ដើម្បីបញ្ជាក់ឲ្យ កាន់តែច្បាស់ ហើយក៏ជាការព្រមានដល់ជនខិលខូចដែលកំពុងបន្លំខ្លួនចូលក្នុងបញ្ជីនៃការទទួលបានដីពីគោលនយោបាយឆ្វៀលដីជូនប្រជាពលរដ្ឋរស់នៅ ឬកំពុងអាស្រ័យផល ជាក់ស្តែង ។
សូមអានទាំងស្រុងនូវខ្លឹមសារដែលបង្ហោះនៅលើហ្វេសប៊ុកផ្លូវការរបស់ក្រសួងបរិស្ថាន ៖
ក្រសួងបរិស្ថានព្រមានជនឆ្លៀតឱកាសពីការបែងចែកនឹងទទួលដីធ្លីនឹងត្រូវមានទោស
កាលពីថ្ងៃទី ៣ ខែ កក្កដា ឆ្នាំ ២០២០ នៅក្នុងកិច្ចប្រជុំពេញអង្គគណៈរដ្ឋមន្ត្រី បន្ទាប់ពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាទៅក្រសួងទាំង៣ គឺក្រសួងបរិស្ថាន ក្រសួងកសិកម្ម និងក្រសួងរៀបចំដែនដី អោយកាត់ឆ្វៀលដីជូនប្រជាពលរដ្ឋដែលកំពុងរស់នៅអាស្រ័យផលក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ ក្នុងនោះគឺ សម្តេចតេជោ បានបញ្ជាក់សង្កត់ធ្ងន់ច្បាស់ៗថាៈ
១)ចំពោះពលរដ្ឋដែលកំពុងរស់នៅអាស្រ័យផលជាក់ស្តែងក្នុងតំបន់ដីរដ្ឋដូចបញ្ជាក់ខាងលើ គឺហាមកាប់ឆ្ការទន្ទ្រានវាតទីយកដីបន្ថែម គឺមិនអនុញ្ញាត្តិជាដាច់ខាត។ កន្លងមក សម្តេចតេជោ បានសង្កេតឃើញមានតែអ្នកមានអំណាច និងអ្នកមានទ្រព្យច្រើនប្រើអ្នកតូចតាចអោយទៅកាប់រុករានទន្ទ្រានយកដីអោយខ្លួន។ រីឯចំពោះក្រុមជនខិលខូចដែលទៅទន្ទ្រានយកដីរដ្ឋក្នុងមួយយប់ធ្វើបានខ្ទមពី១០ទៅ
២០ ក៏សម្តេចតេជោបានដឹងនឹងកំណត់អត្តសញ្ញាណនិងមុខសញ្ញារួចអស់ហើយដែរ។ បើរកឃើញថាអ្នកទាំងនោះបានប្រព្រឹត្តិមែននោះគឺនឹងត្រូវចាប់ខ្លួន។
២) ចំពោះការបែងចែកដីជូនប្រជាពលរដ្ឋ គឺក្រសួងពាក់ព័ន្ធ និងអាជ្ញាធរត្រូវធ្វើអោយបានហ្មត់ចត់ត្រឹមត្រូវ ហាមដាច់ខាតឆ្លៀតកេងចំណេញយកចំណែកខ្លួនពីការបែងចែកដីជូនពលរដ្ឋ គឺនឹងត្រូវទទួលទោសជាកំហិត។
៣)ក្រៅពីកាត់ឆ្វៀលដីជូនប្រជាពលរដ្ឋទៅតាមទំហំរស់នៅជាក់ស្តែង គឺរដ្ឋនឹងបន្ថែមជូនផ្ទៃដី១០% ជាប្រយោជន៍រួមសម្រាប់សហគមន៍ប្រើប្រាស់ជាព្រៃរកឱស និងជាជម្រកសត្វគោក្របីស៊ីស្មៅជាដើម។
សម្តេចតេជោនាយករដ្ឋមន្ត្រី បានបញ្ជាក់សារជាថ្មីដល់មន្ត្រី អ្នកមានអំណាច និងអ្នកមានទ្រព្យធនស្តុកស្តម្ភទាំងឡាយ ល្មមចេះឆ្អែត និងចេះគ្រប់គ្រាន់ហើយ ហើយឈប់ធ្វើបាបប្រជាពលរដ្ឋតទៅទៀត៕
