រាជធានីភ្នំពេញ ៖ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានថ្លែងថា មន្ត្រីត្រូវចៀសវៀង ហើយមិនត្រូវមានទស្សនៈថា អ្នកសរសេរអត្ថបទអវិជ្ជមានសុទ្ធតែអ្នកប្រឆាំង ហើយក៏មិនត្រូវគិតដែរថាឲ្យតែអ្នកកាសែតមានទោស នោះអ្នកកាសែតសុទ្ធតែជាអ្នករងគ្រោះទាំងអស់។ ឯកឧត្តមបញ្ជាក់បន្ថែមថា ការសរសេរអាក្រក់ណាមួយ គឺមិនមែនសុទ្ធតែពួកប្រឆាំងនោះទេ ។
រដ្ឋមន្ត្រីក្រសួងព័ត៌មានបានថ្លែងដូច្នេះនៅក្នុងវេទិកាពិភាក្សាវាយតម្លៃសកម្មភាពស្តីពីសន្និសីទសារព័ត៌មាន ដែលរៀបចំឡើងដោយអង្គភាពអ្នកនាំពាក្យរដ្ឋាភិបាលនាព្រឹកថ្ងៃអង្គារនេះ ។
ឯកឧត្តម ខៀវ កាញារីទ្ធ បានលើកឡើងជាថ្មីថា លោកមិនមានកង្វល់ខ្លាំងទេជុំវិញបញ្ហាព័ត៌មានក្លែងក្លាយ (Fake News) ហើយក៏មិនអាចយកអ្នកសរសេរ Fake News ទាំងអស់ទៅដាក់ទោសបានដែរ ។ ប៉ុន្តែអ្វីដែលសំខាន់បំផុតគឺស្ថាប័នដែលរងនូវព័ត៌មានមិនពិតទាំងអស់នោះ មិនត្រូវដេកលក់ និងត្រូវបំភ្លឺដោយព័ត៌មានពិតឲ្យបានឆាប់រហ័សទើបជាការប្រសើរ ៕
