ខេត្តកោះកុង ៖ តាមប្រភពព័ត៌មានបានឲ្យដឹងថា នៅថ្ងៃទី២៨ ខែកក្កដា នេះ នៅវត្តថ្មសស្ថិតនៅភូមិថ្មស ឃុំថ្មស ស្រុកបុទុមសាគរ ខេត្តកោះកុង មានបើកកិច្ចប្រជុំដោះស្រាយផលប៉ះពាល់ជូនប្រជាពលរដ្ឋដោយសារគម្រោងសាងសង់រោងចក្រអគ្គិសនីដុតធ្យូងថ្ម ហើយមានប្រជាពលរដ្ឋចំនួន២៦គ្រួសារ នៅឃុំថ្ម ស្រុកបូទុមសាគរ ខេត្តកោះកុង បានយល់ព្រមទទួលយកថវិកាសំណងពីគោលនយោបាយរបស់រាជរដ្ឋាភិបាលកម្ពុជា ពីការរងផលប៉ះពាល់ដោយសារតែគម្រោងអភិវឌ្ឍន៍រោងចក្រអគ្គិសនីដុតធ្យូងថ្ម លើផ្ទៃដីប្រមាណជា១៦៨ហិចតា ក្រោមការវិនិយោគរបស់ក្រុមហ៊ុន រ៉ូយ៉ាល់គ្រុប។
ក្នុងចំណោមពលរដ្ឋចំនួន៥៨គ្រួសារដែលរងផលប៉ះពាល់ មាន២៦គ្រួសារហើយដែលព្រមទទួលយកសំណងជាថវិកា គិតជា(សែក) តាមរយៈយន្តការដោះស្រាយដីធ្លី មុននឹងផ្តើមដំណើរការសាងសង់រោងចក្រដុតធ្យូងថ្មទំហំ៧០០មេហ្គាវ៉ាត់ នៅភូមិថ្មស និងភូមិចម្លងគោ ឃុំថ្មស ស្រុកបូទុមសាគរ ខេត្តកោះកុង។
ក្រុមប្រជាពលរដ្ឋលើកឡើងថា ការទទួលសំណងនេះ ក៏ព្រោះតែជាតម្រូវការចាំបាច់លើដំណើរការផ្គត់ផ្គង់ថាមពលអគ្គិសនី និងការអភិវឌ្ឍន៍សេដ្ឋកិច្ចនៅទូទាំងប្រទេសកម្ពុជា ។ទោះបីបារម្ភពីការរងផលប៉ះពាល់ក៏ដោយ ប៉ុន្តែពួកគាត់ទទួលយកស្មោះចិត្តដោយពុំមានការបង្ខិតបង្ខំពីភាគីណាមួយទេ។ ជាក់ស្តែង ដីធ្លីដែលស្ថិតក្នុងគម្រោងធ្វើរោងចក្រធ្យូងថ្ម គឺពួកគាត់អាស្រ័យផលដាំដុះជាកសិកម្មតាំងពីឆ្នាំ១៩៩៣មកម្ល៉េះ។ ប្រជាពលរដ្ឋបានបន្តថា
ដើម្បីបន្តរស់នៅ និងអាស្រ័យផលទៅអនាគត ពួកគាត់នឹងយកថវិការកដីធ្លី ឬបើកអាជីវកម្មនៅទីតាំងផ្សេងតាមដែលលទ្ធភាពអាចធ្វើទៅបាន។ តាមរយៈគម្រោងអភិវឌ្ឍន៍រោងចក្រដុតធ្យូងថ្មនេះដែរ ពលរដ្ឋរំពឹងថា មូលដ្ឋានរស់នៅរបស់ពួកគាត់នឹងមានការប្រែមុខមាត់ថ្មី។
ក្នុងឧកាសនោះ ឯកឧត្តម ស្រ៊ុន ដារិទ្ធ រដ្ឋលេខាធិការក្រសួងបរិស្ថាន ថ្លែងថា ការទូទាត់សំណងជាថវិកាតាមរយៈគោលនយោបាយរាជរដ្ឋាភិបាលកម្ពុជា ចំពោះតម្លៃដីធ្លីធ្វើឡើងតាមតំបន់នីមួយៗឈរលើគោលការណ៍សន្តិវិធី ដូច្នេះតម្លៃមានភាពខុសគ្នាមិនអាចតាមតែចិត្តចង់បានរបស់ប្រជាពលរដ្ឋចំនួន៣២គ្រួសារដែលមិនយល់ព្រមទទួលសំណងនោះទេ។
ជំនួសមុខក្រសួងបរិស្ថាន ឯកឧត្តម ស្រ៊ុន ដារិទ្ធ អរគុណចំពោះពលរដ្ឋចំនួន២៦គ្រួសារយល់ព្រមទទួលសំណងទូទាត់អតិបរិមាកំនត់យោងតាមសិក្សាពីប៉ះពាល់រួម ដោយឡែកពលរដ្ឋជំទាស់ ក្រុមការងារនឹងទុកពេលយ៉ាងយូរ១សប្តាហ៍ទៀត សម្រាប់ការសម្របសម្រួលដោះស្រាយ ។
គម្រោងអភិវឌ្ឍន៍រោងចក្រដុតធ្យូងថ្ម មានអនុភាពដំឡើង ៧០០មេហ្គាវ៉ាត់ ស្ថិតនៅក្រោមការវិនិយោគដោយក្រុមហ៊ុន រ៉ូយ៉ាល់ គ្រុប របស់អ្នកឧកញ៉ា គិត ម៉េង ដោយបោះទុនវិនិយោគសរុប ១៣៤៤,២០លានដុល្លារអាមេរិក។
យោងតាមលិខិតរបស់ទីស្តីការគណៈរដ្ឋមន្រ្តីកាលពីថ្ងៃទី៧ ខែកក្កដា ឆ្នាំ២០២០ យល់ព្រមកំណត់យកតម្លៃអតិបរិមា សម្រាប់ការទូទាត់សំណងគោលនយោបាយជូនប្រជាពលរដ្ឋទទួលរងផលប៉ះពាល់តាមតំបន់ដីនីមួយៗ គឺរួមមាន៖ ដីតំបន់ទី១ តម្លៃ១៥ដុល្លារក្នុង១ម៉ែត្រការ៉េ ដីតំបន់ទី២និងទី៣ តម្លៃ៨ដុល្លារក្នុង១ម៉ែត្រការ៉េ ដីតំបន់ទី៤ ថ្លៃ៣ដុល្លារក្នុង១ម៉ែត្រការ៉េ និងតំបន់ទី៥ ២.៥ដុល្លារក្នុង១ម៉ែត្រការ៉េ៕
