ក្រុងប៉ោយប៉ែត ៖ ប្រភពព័ត៌មានពីភ្ញៀវទេសចរបរទេសបានបង្ហើបឱ្យដឹងថា សមាគមដឹកជញ្ជូនភ្ញៀវទេសចររបស់កម្ពុជា ចំនួនប្រាំ និងក្រុមហ៊ុនចំណតរថយន្តចំនួន ពីរ គឺអូហ្វេសធី និងសូជីង នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ កំពុងជម្រិតប្រាក់ពីភ្ញៀវទេសចរ។
ប្រភពបន្តថា សមាគមដឹកជញ្ជូនភ្ញៀវទេសចររបស់កម្ពុជា ត្រូវបានភ្ញៀវទេសចរនិយាយថា ជម្រិតទារប្រាក់ពីអ្នកធ្វើ ដំណែរីដែលចាត់ទុកថា ជាការរំខាន និងធ្វើប៉ះពាល់អារម្មណ៍របស់ភ្ញៀវ និងការដូរលុយប្រាក់បំបាត់លុយភ្ញៀវនៅចំណតក្រុម ហ៊ុន សូជីង និងអូហ្វេសធី នៅពេលឆ្លងព្រំដែនចូលមកដល់ទឹកដីកម្ពុជា ។ សមាគមដឹកជញ្ជូនភ្ញៀវទេសចរទាំងប្រាំ និងក្រុមហ៊ុនចំណតទាំងពីរនៅច្រកទ្វារអន្តរជាតិប៉ោយប៉ែតមួយណាក៏ដូចមួយណាដែរ គឺសុទ្ធតែដូចគ្នាទាំងអស់គេបង្កើតឡើង ដើម្បីផលប្រយោជន៍រៀងៗខ្លួន ។
ក្រៅពីជម្រិតទារប្រាក់ពីភ្ញៀវ សមាគមដឹកជញ្ជូនភ្ញៀវទេសចរទាំងនោះ ប្តូរប្រាក់ឱ្យភ្ញៀវមិនត្រូវតាមហាងឆេងទៀត ផង ហើយប៉ាយប្តូរប្រាក់មានពីរ គឺមួយត្រឹមត្រូវមួយទៀតមិនត្រឹមតាមស្តង់ដានៃអត្រាប្តូរប្រាក់ទេ ? ហើយលក់ភ្ញៀវទៅឱ្យរថយន្តតាក់ស៊ីតាមអំពើចិត្តដូចជា ធ្វើដំណើរទៅខេត្តសៀមរាប ៤៨ដុល្លារ តែម្ចាស់តាក់ស៊ីទទួលបានត្រឹមតែ ៣០ដុល្លារតែប៉ុណ្ណោះ មិនដឹងថា ១៨ដុល្លារទៀត គេយកទៅណានោះទេ ?
ដោយសារបញ្ហាទាំងអស់នេះ ភ្ញៀវទេសចរមានការរអ៊ូរទាំយ៉ាងខ្លាំងទៅលើក្រុមហ៊ុនរកស៊ីនាំភ្ញៀវទេសចរពី ក្រៅប្រទេសតាមច្រកទ្វារអន្តរជាតិប៉ោយប៉ែតជាច្រើននឹងបានសម្តែងការមិនពេញចិត្តទៅលើសមាគមដឹកជញ្ជូនភ្ញៀវ មានការយឺតយ៉ាវធ្វើឱ្យមតិនានាច្រើនបានរិះគន់ថា បញ្ហាខាងលើមិនអាចកែបាន ពីព្រោះតែអ្នកនៅក្រោយខ្នងរបស់ពួកសមាគម និងចំណតទាំងពីរជាអ្នកមានអំណាចនៅក្នុងជួររដ្ឋាភិបាល ។
សមាគមដឹកជញ្ជូនភ្ញៀវទេសចរទាំងប្រាំ និងចំណតអូហ្វេសធី និងសូជីង មិនអាចទំនាក់ទំនងសុំការបំភ្លឺបានទេ រាល់ការចោទប្រកាន់ខាងលើ ។ ចំណែកលោក ជង់ ឡឹម ប្រធានមន្ទីរទេសចរខេត្តបន្ទាយមានជ័យ បានប្រាប់តាមទូរស័ព្ទ ថា ប្រសិនមានហេតុការអញ្ចឹងមែននោះ លោកនិងចាត់កម្លាំងឱ្យចុះមើលជាបន្ទាន់ តើឯកឧត្តម ថោង ខុន រដ្ឋមន្ត្រីក្រសួងទេស ចរ ដឹងឬអត់ ឬមួយ ឯកឧត្តម ដឹងហើយធ្វើមិនដឹង ឬមួយឃុបឃិតជាមួយឈ្មួញរកស៊ីខុសច្បាប់ ។
គួររំលឹកថា សម្តេច តេជោ ហ៊ុន សែន បានមានប្រសាសន៍ថា ទេសចរចំហរជើងមេឃ ក្នុងន័យបង្កើនភ្ញៀវទេសចរ តែទង្វើអសកម្មខាងលើធ្វើឱ្យបាត់កំណើនភ្ញៀវទេសចរ យ៉ាងច្រើនចូលមកទស្សនាប្រទេសកម្ពុជា និងបាត់ចំណូលរដ្ឋយ៉ាងច្រើនទៀតផង ៕ ដោយ ៖ ទន់ ហួន
