រាជធានីភ្នំពេញ ៖ យោងតាមលិខិតរបស់ទីស្តីការគណៈរដ្ឋមន្ត្រីលេខ ៦៩៥ សជណ.អវ ចុះថ្ងៃទី២១ ខែកក្កដា ឆ្នាំ២០២០ ផ្ញើជូនរដ្ឋមន្ត្រីក្រសួងអប់រំយុវជននិងកីឡាបានបញ្ជាក់ថា រាជរដ្ឋាភិបាលបានយល់ព្រមជាគោលការណ៍ឲ្យក្រសួងអប់រំ យុវជន និងកីឡា សាកល្បងបើកដំណើរការឡើងវិញ នៅដំណាក់កាលទី១ ក្នុងកំឡុងខែសីហា ឆ្នាំ២០២០ នូវគ្រឹះស្ថានសិក្សាឯកជន មានស្តង់ដាខ្ពស់ចំនួន ២០ ដែលមានទីតាំងស្ថិតនៅរាជធានីភ្នំពេញ ក្រុងសៀមរាប និងក្រុងបាត់ដំបង។
លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សាកម្ពុជា បានមានប្រសាសន៍នៅថ្ងៃទី២២ ខែកក្កដានេះថា សាលាអន្តរជាតិធំៗ ចំនួន២០ដែលមានស្តង់ដារខ្ពស់បើកដំណើរការឡើងវិញនៅ ខែសីហា ឆ្នាំ២០២០ខាងមុខនេះជាសាលាកម្រិតចំណេះដឹងទូទៅសម្រាប់សិស្ស ដែលជាកូនចៅរបស់មន្ត្រីការទួតនិងអ្នកជំនួញ ដែលមានការបង់ថ្លៃសិក្សាខ្ពស់ចាប់ពី៤ពាន់ទៅជាង១ម៉ឺនដុល្លារ។
លោកបានបន្តថា សាលាទាំង២០នោះ មាននៅរាជធានីភ្នំពេញចំនួន១៧ ខេត្តសៀមរាបចំនួន២ និងខេត្តបាត់ដំបងចំនួន១ ដែលសាលាទាំងនេះ នឹងត្រូវដាក់ពាក្យស្នើសុំមកក្រសួងជាមុនសិន ដើម្បីឲ្យក្រុមការងារក្រសួងចុះពិនិត្យសាលាតើមានលក្ខណៈស្តង់ដារអនាម័យខ្ពស់តាមការណែនាំរបស់ក្រសួងសុខាភិបាលនិងអង្គការសុខភាពពិភពលោក ៕
