អន្តរជាតិ ៖ ទឹកជំនន់បានវាយប្រហារនៅទូទាំងតំបន់ភាគកណ្តាលនិងភាគខាងកើតប្រទេសចិន ដែលបានបណ្តាលឱ្យមនុស្សជាង១៤០ នាក់បានស្លាប់ឬបាត់ខ្លួន ខណៈ អាជ្ញាធរបានព្រមានថាស្ថានភាពអាក្រក់បំផុតមិនទាន់មកដល់នៅឡើយទេ។ នេះបើយោងតាមប្រភពពី CNA។
ទឹកជំនន់នៅរដូវក្តៅគឺជាគ្រោះមហន្តរាយប្រចាំឆ្នាំនៅក្នុងប្រទេសចិនចាប់តាំងពីសម័យបុរាណ ។ទឹកជំនន់ទាំងនេ បានហូរបុកចូលទៅក្នុងអាងទន្លេ Yangtze ដែលលាតសន្ធឹងស្ទើរពាសពេញតំបន់ ភាគកណ្តាលនៃប្រទេសចិន។ ភ្លៀងបានធ្លាក់ចាប់តាំងពីចុងខែមិថុនាបានជន់លិចតំបន់ធំៗបណ្តាលឱ្យមនុស្ស ១៤១ នាក់ស្លាប់ឬបាត់ខ្លួន និងបានបង្កផលប៉ះពាល់ដល់មនុស្សប្រមាណ ៣៧.៨៩លាននាក់ ខណៈផ្ទះសំបែងចំនួនជាង ២៨,០០០ខ្នងត្រូវបានបំផ្លិចបំផ្លាញ។
មន្ត្រីក្រសួងធនធានទឹកបាននិយាយនៅក្នុងសន្និសីទខ្លីមួយនៅទីក្រុងប៉េកាំងនៅថ្ងៃច័ន្ទថា កម្ពស់ទឹកទន្លេចំនួន ៣៣ បានឈានដល់កម្រិតខ្ពស់បំផុត មិនធ្លាប់មានពីមុនមក ខណៈពេលដែលទន្លេចំនួន ៤៣៣ ត្រូវបានអាជ្ញាធរប្រកាសពីភាពអាសន្ន។
ប្រព័ន្ធផ្សព្វផ្សាយរដ្ឋរបស់ចិនកាលពីចុងសប្តាហ៍បានបង្ហាញពីទីប្រជុំជន ជាច្រើនបានលិចលង់ដោយទឹកជំនន់ដែលបានកើនឡើងនៅកន្លែងខ្លះទៅដល់ដំបូលផ្ទះ ខណៈបុគ្គលិកជួយសង្គ្រោះបានជម្លៀសបុរសស្ត្រីនិងកុមារចេញដោយទូកទៅកាន់ទីតួសុវត្ថិភាព ។ ខេត្តដែលរងគ្រោះខ្លាំងជាងគេគឺខេត្ត Jiangxi, Hubei និង Hunan នៅភាគកណ្តាលប្រទេសចិន។ ចំណែកឯ នៅតំបន់ភាគខាងកើត គេឃើញមានដូចជា ខេត្ត Anhui, ខេត្ត Zhejiang, ខេត្ត Jiangsu និងខេត្ត Chongqing។
លោកប្រធានាធិបតីស៊ីចិន លោក Xi Jinping កាលពីថ្ងៃអាទិត្យបានអំពាវនាវឱ្យអាជ្ញាធរនៅតំបន់ដែលរងផលប៉ះពាល់ត្រូវប្រមូលផ្តុំដើម្បីជួយដល់ប្រជាជនដែលរងគ្រោះដោយជម្លៀសពួកគេទាំងអស់ឲ្យកាន់ទីតួសុវត្ថិភាព។
សូមជម្រាប់ថា គ្រោះទឹកជំនន់ដ៏អាក្រក់បំផុតរបស់ប្រទេសចិនក្នុងប៉ុន្មានទស្សវត្សចុងក្រោយនេះបានកើតឡើងក្នុងឆ្នាំ១៩៩៨ ដែលកាលណោះវាបានឆក់យកជីវិតមនុស្សប្រមាណជាង ៤,០០០នាក់ ហើយភាគច្រើនស្ថិតក្នុងតំបន់ ជុំវិញទន្លេយ៉ាងស្សេ (Yangtze) ដូចគ្នានេះតែម្តង៕
