ខេត្តកំពង់ធំ ៖ បញ្ហាបម្រែបម្រួលអាកាសធាតុរាំងខុសរដូវធ្វើឲ្យប្រភពទឹកសម្រាប់ផ្គត់ផ្គង់ការធ្វើកសិកម្ម ជាពិសេសដំណាំស្រូវ កំពុងរងផលប៉ះពាល់ ជាក់ស្តែងស្រូវបង្កើនរដូវរបស់ប្រជាពលរដ្ឋនៅស្រុកបារាយណ៍ និងស្រុកតាំងគោក ប្រមាណជាង១៧០០ហិចតា កំពុងខ្វះខាតទឹក និងបូមទឹកសង្គ្រោះ ដោយក្រុមអន្តរាគមន៍សម្តេចតេជោ។
របាយទឹកភ្លៀងនៅក្នុងខេត្តកំពង់ធំចាប់តាំងដើមឆ្នាំ២០២០ រហូតមកដល់ខែកក្កដា នេះមានសភាពតិចតួចធ្វើឲ្យប្រភពទឹកសម្រាប់ប្រើប្រាស់ក្នុងការបង្កបង្កើនផលធ្វើស្រែប្រាំងមិនគ្រាប់គ្រាន់ អាចនឹងខូចខាតស្រូវជាច្រើនហិចតារបស់ប្រជាពលរដ្ឋ។
ស្របពេលនេះ ឯកឧត្តម ថោង ខុន ប្រធានក្រុមការងារថ្នាក់ជាតិចុះជួយខេត្តកំពង់ធំ និងឯកឧត្តម សុខ លូ អភិបាលខេត្តកំពង់ធំ ចុះពិនិត្យ និងឧបត្ថម្ភ គ្រឿងឧបភោគ បរិភោគ មួយចំនួនដល់ក្រុមអន្តរាគមន៍ ដែលកំពុងបូមទឹកសង្គ្រោះស្រូវប្រជាពលរដ្ឋរបស់សម្តេចតេជោ ហ៊ុន សែន។ ដែលក្នុងនោះក្រុម អន្តរាគមន៍បូមទឹកដាក់ម៉ាស៊ីនជាច្រើនគ្រឿងដើម្បីនាំទឹកពីប្រឡាយមេ ទៅប្រឡាយជើងក្អែម បន្តចែកជូនទៅកាន់ស្រែរបស់ប្រជាពលរដ្ឋ។ បច្ចុប្បន្ននេះស្រូវបង្កើនផលរបស់ប្រជាពលរដ្ឋ ដែលប្រឈមប៉ះពាល់សរុបទាំងពីរស្រុកមានប្រមាណ៣៣០០ហិកតា ក្នុងនោះ ស្រុកតាំងគោកមាន ចំនួន២០០០ហិកតា និងស្រុកបារាយណ៍១៣០០ហិកតា។ ហើយផ្ទៃដីសង្គ្រោះបានសរុបមានចំនួន ១៥១០ ហិចតា និងកំពុងសង្គ្រោះមានចំនួន ជាង១៧០០ហិចតា។
ក្រុមប្រជាពលរដ្ឋលើកឡើងដែរថា បរិមាណធាទឹកនៅក្នុងប្រឡាយមេឆ្នាំនេះ មានសភាពតិចជាងរាល់ឆ្នាំ ដែលមិនអាចឲ្យទឹកហូរចូលតាមប្រឡាយតូចៗទៅកាន់ស្រែបាន។ ដូច្នេះធ្វើឲ្យប្រភពទឹកទៅមិនដល់ស្រែរបស់ពួកគាត់ ដែលដាក់ម៉ាស៊ីនតូចៗបូមបញ្ចូលទៅក្នុងស្រែគ្រប់គ្រាន់ឡើយ។
ក្រុមប្រជាពលរដ្ឋ សូមថ្លែងអំណរគុណសម្តេចតេជោ ដែលបានផ្តល់កម្លាំងអន្តរាគមន៍ចុះជួយបូមទឹកសង្គ្រោះស្រូវរបស់គាត់ និងសូមសំណូមពរឲ្យកម្លាំងបង្កើនការបូមទឹកពីប្រឡាយមេ ទៅប្រឡាយរងបន្ថែមទៀត ដើម្បីស្រូវដែលនៅកន្លែងឆ្ងាយៗមានទឹកផងដែរ៕
