ខេត្តព្រៃវែង ៖ រៀនចប់មហាវិទ្យាល័យITធ្វើការធុញទ្រាន់មកចិញ្ចឹមកង្កែបត្រីវិញ ធ្លាប់តែឃើញ អ្នករៀនមហាវិទ្យាល័យកសិកម្ម ធ្វើកសិកម្ម ក៍ប៉ុន្តែយុវជនម្នាក់បែរជារៀនចប់មហាវិទ្យាល័យIT ធ្វើការរាប់ឆ្នាំ រហូតទៅធ្វើការងារនៅប្រទេសថៃ ពេលចុងក្រោយបានសម្រេចចិត្តមកធ្វើវារីវប្បកម្ម នៅភូមិកំណើតរបស់ខ្លួនទៅវិញ ។
បើយោងតាមមន្ត្រីមន្ទីរកសិកម្មខេត្តព្រៃវែងអោយដឹងថា យុវជនម្នាក់ឈ្មោះ រី វុទ្ធី រស់នៅភូមិដុំ ឃុំពានរោង ស្រុកស្វាយអន្ទរ ខេត្តព្រៃវែង បានបព្ចាប់ការសិក្សាជំនាញបច្ចេកវិទ្យាពត៌មាន (IT) នៅសកលវិទ្យាល័យបន្ទាយមានជ័យ ហើយបានទៅធ្វើការ ផ្នែកបច្ចេកវិទ្យាពត៌មាននៅប្រទេសថៃ ចំនួន៧ឆ្នាំ។ ហើយនៅឆ្នាំ២០១៦ គាត់បានសម្រេចចិត្តត្រឡប់មកស្រុកភូមិរបស់គាត់វិញ ដោយបានចាប់ផ្តើមសាកល្បងបង្កាត់ភ្ញាស់កូនកង្កែប ដែលគាត់បានទិញមេពូជកង្កែបចំនួន៤គូរ ពីមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាប (បាទី) ស្រុកពាមរក៍ ខេត្តព្រៃវែង ។ រយ:ពេល៤ឆ្នាំ គាត់បានទទួលជោគជ័យដោយបង្កើតជាកសិដ្ឋាន មានឈ្មោះមាគ៌ាជលសា បានផលិតនិងលក់កូនកង្អែបពូជប្រហែល ១០ ម៉ឺនកូន កង្កែបសាច់៦តោន និងត្រីទីឡាព្យាសាច់ ១២ តោន។
មន្ត្រីបានបន្តថា សព្វថ្ងៃកសិដ្ឋានមាគ៌ាជលសារបស់គាត់ កាន់តែមមាញឹកក្នុងការលក់កូនកង្កែប និងត្រីសាច់ ដោយមានមេពូជកង្កែប ៣០០០ គូរ សម្រាប់ផលិតកូនកង្កែបថែមទៀតផង ៕
