ខេត្តព្រះវិហារ ៖ នៅថ្ងៃទី០៩ ខែកក្កដា ឆ្នាំ២០២០ កម្លាំងស្នងការដ្ឋាននគរបាលខេត្តព្រះវិហារ ដឹកនាំដោយលោកឧត្តមសេនីយ៍ត្រី កែវ ចំរើន ស្នងការរងទទួលផែនការងារនគរបាលព្រហ្មទណ្ឌខេត្ត បានចុះធ្វើការបង្ក្រាបកន្លែងលួចបើកល្បែងស៊ីសងខុសច្បាប់ (ជល់មាន់) មួយកន្លែង នៅចំណុចចំការស្វាយ ស្ថិតនៅក្នុងភូមិសាស្ត្រភូមិចំបក់សែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។
លោកឧត្តមសេនីយ៍ត្រី កែវ ចំរើន បានឲ្យដឹងថា ការបង្រ្កាបកន្លែងលួចបើកល្បែងស៊ីសងខុសច្បាប់ (ជល់មាន់) ០១កន្លែងខាងលើនេះ ដោយមានការបញ្ជាផ្ទាល់ពីលោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ និងមានការសម្របសម្រួលពីលោក ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារ ។
លោកឧត្តមសេនីយ៍ត្រី បន្តថា ភ្លាមៗនោះលោកបានដឹកនាំការិយាល័យជំនាញចុះទៅដល់ទីតាំង ដោយមុខសញ្ញាបានរត់គេចខ្លួនអស់ ហើយកម្លាំងបានធ្វើការដកហូតសម្ភារៈ និងវត្ថុតាងមួយចំនួន រួមមាន ៖ មាន់ជល់ចំនួន០៦ក្បាល ឡាន១០គ្រឿង ម៉ូតូ១៣គ្រឿង និងសម្ភារៈបម្រើល្បែងស៊ីសងមួយចំនួនទៀតផងដែរ។
បច្ចុប្បន្ន សមត្ថកិច្ចជំនាញកំពុងរៀបចំសំណុំរឿងតាមនីតិវិធីច្បាប់ និងរាយការណ៍ជូនព្រះរាជអាជ្ញាអមសាលាដំបូងខេត្តសុំការសម្រេច៕
