ខេត្តក្រចេះ ៖ ជនសង្ស័យដៃដល់ឈ្មោះ ធា ធី អាយុ៤២ឆ្នាំ រស់នៅភូមិចង្ហប ឃុំក្បាលដំរី ស្រុកសំបូរ ខេតក្រចេះ ត្រូវបានធ្វើការចាប់ខ្លួនបានភ្លាម កាលពីល្ងាចថ្ងៃទី៦ ខែកក្កដា នៅពេលជនដៃដល់បានដុតគ្រឿងបំផ្ទុះកែច្នៃ បំផ្ទុះខុសបច្ចេកទេសអស់មួយ គ្រាប់ និងបានផ្ទុះដាច់ម្រាមដៃខ្លួនឯង និងត្រូវលើរាងកាយកូនប្រុសអាយុ៧ឆ្នាំម្នាក់ទៀត។
កម្លាំងនគរបាលស្រុកសំបូរ បានធ្វើការចាប់ខ្លួនបុរសម្នាក់ ពាក់ព័ន្ឋករណីប៉ុនប៉ងមនុស្សឃាត ខណះជនដៃដល់រូបនេះបានកែច្នៃគ្រឿងបំផ្ទុះធ្វើពីរំសេវផាវដាក់ក្នុងដបទឹកបរិសុទ្ឋ ក្នុងចេតនាដុតបំផ្ទុះសម្លាប់ឱពុកនិងម្តាយក្មេកនៅក្នុងផ្ទះ តែដោយសារបំផ្ទុះខុសបច្ចេកទេសបណ្តាលឲ្យផ្ទុះត្រូវរបួសខ្លួនឯង។
នគរបាលស្រុកសំបូរនិយាយថា ជនសង្ស័យដៃដល់ឈ្មោះ ធា ធី អាយុ៤២ឆ្នាំ រស់នៅភូមិចង្ហប ឃុំក្បាលដំរី ស្រុកសំបូរ ត្រូវបានធ្វើការចាប់ខ្លួនបានភ្លាម កាលពីល្ងាចថ្ងៃទី៦ ខែកក្កដា។
ដើមចមដែលឈានឲ្យមានករណីប៉ុនប៉ងអំពើមនុស្សឃាតពីកូនប្រសារទៅលើឱពុក ម្តាយក្មេកនេះ ត្រូវបាននគរបាលរកឃើញថា ផ្តើមចេញដោសាររឿងគំនុំ។ ព្រោះកន្លងមក ជនដៃដល់ម្នាក់នេះ មានគំនុំទៅលើឱពុកម្តាយក្មេក ដោយចោទថា ការលែងលះរវាងរូបគេជាមួយនិងប្រពន្ឋកាលពី២ឆ្នាំមុន ដោយសារតែឱពុកម្តាយក្មេកទាំងពីរនាក់នេះ។
អធិការរងនគរបាលស្រុកសំបូរ លោកវរសេនីយ៍ទោ ណយ ស៊ីថាច បានបញ្ជាក់ថា តាមការសាកសួរជននេះ មានចេតនាប៉ុនប៉ងកែច្នៃរំសេវផ្ទុះ ដើម្បីយកមកបំផ្ទុះសម្លាប់ឱពុកម្តាយក្មេកនៅក្នុងផ្ទះនេះចំនួន២លើកមកហើយ តែមិនបានសម្រេច។ ហើយរំសេវផ្ទុះដែលជននេះ បានកែច្នៃធ្វើជាឧបករណ៍ផ្ទុះ គឺមានគុណភាពអាចបំផ្ទុះសម្លាប់អាយុជីវិតមនុស្សបាន។
នៅថ្ងៃកើតហេតុ ជននេះបានកែច្នៃដោយយករំសេវផាវ មកបុកដាក់ចូលដបទឹកបរិសុទ្ឋចំនួន៣ដប និងមានសាំងមួយលីត្រកន្លះ ក្នុងចេតនាដុតបំផ្ទុះចូលផ្ទះដើម្បីសម្លាប់ឱពុកម្តាយក្មេក តែមិនបានសម្រេច។ ជននេះបានលែងលះជាមួយប្រពន្ឋមានរយះពេលជាង២ឆ្នាំមកហើយ។ ដោយសារតែជននេះតែងតែបង្កហិង្សារក្នុងគ្រួសារឥតឈប់ឈរ។ ជននេះមានកូន២នាក់ ស្រី១នាក់ ដោយបន្សល់ទុកកូនប្រុសអាយុ៧ឆ្នាំម្នាក់នៅជាមួយគេដល់សព្វថ្ងៃ។ ចំនែកស្រ្តី ជាប្រពន្ឋ ក្រោយការលែងលះក៏ទៅធ្វើការងារនៅខេត្តព្រះសីហនុ ជាមួយនិងកូនស្រីម្នាក់បាត់ មិនត្រឡប់មកវិញ។
លោកអធិការរង បញ្ជាក់ថា ជនដៃដល់បានរងគ្រោះដាច់ម្រាមដៃនិងដងខ្លួន និងកំពុងព្យាបាលដើម្បីមានវិធានការតាមផ្លូវច្បាប់បន្ត៕
