ខេត្តកំពង់ធំ ៖ លោក ខេន ឈុនគ័រ អធិការនគរបាលស្រុកកំពង់ស្វាយនិងក្រុមការងារផ្តល់អាគារប៉ុស្តិ៍នគរបាលរដ្ឋបាល
ឃុំកំពង់ស្វាយ ស្ថិតនៅភូមិទួលក្បិល ឃុំកំពង់ស្វាយ និងផ្ទះមួយខ្នងដល់មន្ត្រីនគរបាលមានជីវភាពខ្វះខាតស្ថិតនៅភូមិប្រាសាទ ឃុំត្រពាំងប្ញស្សី ស្រុកកំពង់ស្វាយ ខេត្តកំពង់ធំ នៅថ្ងៃទី០៦ ខែកក្តដា ឆ្នាំ២០២០ ។
លោក ខេន ឈុនគ័រ បានលើកឡើងថា ដើម្បីជួយសម្រួលដល់មន្ត្រីនគរបាលដែលមានជីវភាពខ្វះខាត លោកបានធ្វើការអំពាវនាវដល់មន្ត្រីនិងសប្បុរសជនឲ្យជួយសងផ្ទះជូនលោក អ៊ុក សែត ជាមន្ត្រីនគរបាលដែលមានជីវភាពខ្វះខាត
រស់នៅជាមួយកូន៧នាក់ ប្រពន្ធស្លាប់ចោលជាង១០ឆ្នាំមកហើយ មានតែកូនផ្ទះតូចមួយរស់នៅ សង្ឃឹមតែប្រាក់ខែដើម្បីចិញ្ចឹមកូន។ ដោយមើលឃើញពិការលំបាក លោកក៏បានអំពាវនាវរកថវិកាសង់ផ្ទះតៀមជាប់ដីមានទំហំ៧ម៉ែត្រx៦ម៉ែត្រ ធ្វើអំពីថ្មចាក់បេតុង ជញ្ជាំងនិងដំបូលស័ង្កសី ចំណាយថវិកាអស់១១.៩៤១.៥០០រៀល។
ដោយឡែកសម្រាប់អាគារប៉ុស្តិ៍នគរបាលរដ្ឋបាលឃុំកំពង់ស្វាយត្រូវបានប្រគល់ពេលនេះមានទំហំ៩ម៉ែត្រx៤,៥០ម៉ែត្រ
ធ្វើពីថ្មចាក់បេតុង ជញ្ជាំងថ្ម ដំបូលស័ង្កសី និងចាក់ដីខាងមុខ ដោយចំណាយថវិកាអស់២១.៨៤០.០០០ រៀល ។
លោកបានបន្តថា សម្រាប់ការសាងសង់ផ្ទះនិងអាគារប៉ុស្តិ៍នគរបាលរដ្ឋបាលនេះ មិនមែនជាលើកទីមួយទេ គឺបានសាងសង់ផ្ទះចំនួន៣ខ្នងមកហើយ និងអាគារប៉ុស្តិ៍នគរបាលរដ្ឋបាលចំនួន៤ដងមកហើយដែរ ។
ក្នុងពិធិប្រគល់ទទួលលោក ខេន ឈុនគ័រ ក៍បានបញ្ជាក់ផងដែរថា លោកតែងតែបានផ្តល់នូវស្បៀងអាហារគ្រឿងឧបភោគ បរិភោគនិងថវិកា ដើម្បីជួយដោះស្រាយដល់មន្ត្រីដែលមានជីវភាពខ្វះខាត និងមានជម្ងឺក្នុងឱកាសនេះផងដែរ លោកបានផ្តាំផ្ញើដល់មន្ត្រីនគរបាលក្នុងស្រុកកំពង់ស្វាយទាំងអស់ ត្រូវមានការប្រុងប្រយ័ត្នទប់ស្កាត់ការឆ្លងរីករាលដាលមេរោគកូវីដ១៩ ដោយអនុវត្តន៍ឲ្យបានត្រឹមត្រូវតាមការណែនាំរបស់ក្រសួងសុខាភិបាលនិងសូមឲ្យបងប្អូនទាំងអស់រួមគ្នាថែរក្សាសុខសន្តិភាពដែលយើងកំពុងមានសព្វថ្ងៃនេះឲ្យបានគង់វង្ស ពិសេសខិតខំការពារសន្តិសុខសណ្តាប់ធ្នាប់និងបម្រើសេវាសាធារណៈជូនប្រជាពលរដ្ឋឲ្យបានឆាប់រហ័សទាន់ពេលវេលា។
ជាមួយគ្នានេះដែរមន្ត្រីននគរបាលនិងប្រជាពលរដ្ឋមានការសប្បាយចិត្តដែលទទួលបានផ្ទះនិងអាគារប៉ុស្តិ៍នគរបាលរដ្ឋបាល សូមជូនពរលោក ខេន ឈុនគ័រ មានសុខភាពល្អ ជោគជ័យគ្រប់ភារកិច្ច ៕
