ខេត្តព្រះវិហារ ៖ ប្រជាពលរដ្ឋរាយការណ៏មកថា សកម្មភាពដឹកជញ្ជូនឈើដោយខុសច្បាប់ត្រូវបានប្រទះឃើញជារៀងរាល់យប់ តាមរថយន្តសាំយ៉ុង និងការដឹកជញ្ជូនតាមរ៉ឺម៉កសណ្តោង ដោយពុំមានការបង្ក្រាប និងទប់ស្កាត់ពីសំណាក់មេព្រៃនោះឡើយ ដែលជាហេតុធ្វើឲ្យមានការដឹកជញ្ជូនឈើដូចសត្វកណ្តៀរ តាមបណ្តោយផ្លូវលាតសន្ធឹងពីស្រុករវៀង ខេត្តព្រះវិហារ មកទម្លាក់នៅព្រំប្រទល់ខេត្តកំពង់ធំ ។
ការដឹកជញ្ជូនឈើទាំងនេះ មានសកម្មភាពយ៉ាងគឃ្លើន ដោយពុំមានការខ្លាចញញើតច្បាប់សូម្បីបន្តិច ឡើយ ដែលជាហេតុធ្វើឲ្យមានការសង្ស័យថា ករណីឈ្មួញដឹកឈើទាំងរថយន្តនិងរ៉ឺម៉កនេះ មានការបើកភ្លើងខៀវពីសំណាក់ផ្នែករដ្ឋបាលព្រៃឈើរវៀង និងសង្កាត់រដ្ឋបាលព្រៃឈើរវៀង ទើបបានជាឈ្មួញឈើទាំង ធ្វើសកម្មភាពដឹកជញ្ជូនដោយរលូន ។
ជាក់ស្តែងកាលពីថ្មីៗកន្លងទៅនេះ សកម្មភាពដឹកឈើរបស់លោក សាន ដែលជាមេឈ្មួញជើងខ្លាំងដឹកជញ្ជូនឈើលេខ២ រាប់សិបឡាន ឆ្លងកាត់មុខសង្កាត់រដ្ឋបាលព្រៃឈើរវៀង រួមទាំងរ៉ឺម៉កដឹកឈើជាច្រើនគ្រឿងទៀត តែពុំត្រូវបានហាមឃាត់នោះឡើយ ធ្វើឲ្យមានការរិះគន់យ៉ាងចាស់ដៃ ពីសំណាក់ប្រជាពលរដ្ឋថា មេព្រៃប្រៀបបាននឹងមេខ្មូត បើរស់នៅព្រៃមិនស៊ីឈើ ហេតុអ្វីបានជាព្រៃឈើរលាយ និយាយរួមគឺ បើគ្មានការបើកដៃពីមេព្រៃទេ ឈ្មួញឯណាថ្លើមធំហ៊ានដឹកជញ្ចូនឈើទាំងនេះ ។
តាមប្រភពព័ត៌មានច្បាស់ការបានបញ្ជាក់ឲ្យដឹងថា ការដឹកជញ្ជូនឈើដោយខុសច្បាប់គឺបណ្តាលមកពីផ្នែក និងសង្កាត់ព្រៃឈើរវៀង ដែលជាអ្នកបើកភ្លើងខៀវឲ្យមានការដឹកជញ្ជូនតាមរថយន្តយីឌុប និងរថយន្តកូរ៉េ រួមទាំងរថយន្តសាំយ៉ុង បានធ្វើសកម្មភាពយ៉ាងគគ្រឹគគ្រេង ចាប់តាំងពីលោក នួន សុខុម នាយខណ្ទរដ្ឋបាលព្រៃឈើឡើងថ្មី គឺមានសកម្មភាពដឹកជញ្ជូនឈើដោយខុសច្បាប់កក្រើកទឹកដីខេត្តព្រះវិហារ ដែលផ្ទុយពីការប្រកាសបិទរបស់ឯកឧត្តម រដ្ឋមន្រ្តីក្រសួងកសិកម្ម មិនឲ្យខណ្ទ ផ្នែក សង្កាត់រដ្ឋបាលព្រៃឈើ នានាចេញច្បាប់អនុញ្ញាតិឲ្យដឹកជញ្ជូនឈើនោះទេ ប៉ុន្តែចាប់តាំងពីលោក នួន សុខុម ឡើងជានាយខណ្ទគឺ ព្រៃឈើជិតរលាយហើយ ដោយមិនខ្វល់ពីការហាមឃាត់នោះឡើយ។
ជាក់ស្តែងឈើតាមដេប៉ូនៅក្នុងខេត្តកំពង់ធំ គឺសុទ្ធសឹងតែដឹកចេញពីខេត្តព្រះវិហារ ចេញពីស្រុកជាយសែន ស្រុករវៀង និងស្រុកមួយចំនួនទៀត ដែលបានដឹកឈើដោយខុសច្បាប់ យកមកទម្លាក់នៅដេប៉ូឈើព្រំប្រទល់ខេត្តកំពង់ធំ ហើយម្ចាស់ដេប៉ូឈើ ដឹកឈើទាំងនោះមកដាក់នៅដេប៉ូឈើនៅក្នុងខេត្តកំពង់ធំ រួចចេញវិក័យប័ត្រថាជាឈើស្របច្បាប់។
គេហទំពរ័យើងពុំអាចសុំការបំភ្លឺពីលោក នួន សុខុម បានទេ ព្រោះពុំមានលេខទូរសព្ទ័៕
