រាជធានីភ្នំពេញ ៖ នៅល្ងាចថ្ងៃទី១៥ ខែសីហា ឆ្នាំ២០១៨ គណបក្សរាជានិយមហ្វ៊ុនស៊ិនប៉ិច ដែលទើបមានប្រធានស្តីទី បានលេងធម៏ក្តៅ ចេញការព្រមានដល់មន្ត្រីរបស់ខ្លួន មិនឲ្យមានការយកលុយរត់ការ ដើម្បីបានតួនាទីនៅក្នុងរាជរដ្ឋាភិបាលអាណត្តិទី៦ បើមានត្រូវទទួលខុសត្រូវចំពោះមុខច្បាប់ជាធរមាន។
នៅក្នុងសេចក្តីជូនដំណឹងរបស់គណបក្សហ្វ៊ុនស៊ិនប៉ិចបានបញ្ជាក់យ៉ាងដូច្នេះថា ៖ «ចំពោះបញ្ហានេះ យើងបានហាមឃាត់ដាច់ខាត ព្រោះមិនមែនជានយោបាយរបស់គណបក្សហ្វ៊ុនស៊ិនប៉ិច ដែលនាំទៅដល់ការប្រព្រឹត្តអំពើពុករលួយនោះទេ។ បុគ្គលណាឬក្រុមណានៅក្នុងគណបក្សហ៊្វុនស៊ិនប៉ិច ដែលមានការពាក់ព័ន្ធចំពោះករណីនេះ ត្រូវទទួលខុសត្រូវចំពោះមុខច្បាប់ជាធរមាន»។
សូមបញ្ជាក់ដែរថា កាលពីព្រឹកថ្ងៃទី១៥ ខែសីហានេះថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ពេលជួបសំណេះសំណាលជាមួយកម្មករ កម្មការិនី នៅរាជធានីភ្នំពេញជាមួយនិងការបង្ហើបថានឹងទទួលយកមន្ត្រីគណបក្សផ្សេងឲ្យចូលធ្វើការជាមួយក្នុងតួនាទីជារដ្ឋលេខាធិការឬអនុរដ្ឋលេខាធិការ ក៏បានប្រកាសឲ្យដឹងថា៖ មានមន្ត្រីមួយចំនួននៅក្នុងគណបក្សហ៊្វុនស៊ិនប៉ិច និងគណបក្សខ្មែររួបរួមជាតិរបស់លោក ញឹក ប៊ុនឆៃ យកលុយរត់ការដើម្បីទទួលបានតំណែងនៅក្នុងរាជរដ្ឋាភិបាល។
សូមបញ្ជាក់ដែរថា ក្នុងប្រពន្ធ័សមាមាត្រសព្វថ្ងៃនេះ សមាជិកបក្សដូចជាជាប់ចំណងអញ្ចឹង មិនអាចចេញឬធ្វើអ្វីតាមឧត្តមគតិខ្លួនឯងបាននោះឡើយ ប្រសិនបើចង់ធ្វើអ្វី គឺត្រូវដើចេញពីគណបក្សដើមជាមុនសិនទើបបាន៕
