ខេត្តព្រះវិហារ៖ ឯកឧត្តម អ៊ុន ចាន់ដា អភិបាលខេត្តព្រះវិហារ បានទូងគងជ័យបង្ហាញពីភាពជោគជ័យរបស់ គណបក្សប្រជាជនកម្ពុជា ដែលមានប្រជាពលរដ្ឋបានអញ្ជើញទៅបំពេញកាតព្វកិច្ច បោះឆ្នោតគាំទ្រគណបក្សប្រជាជនកម្ពុជា យ៉ាងភ្លូកទឹកភ្លូកដីដើម្បីគាំទ្រសម្តេចតេជោ ហ៊ុន សែន ធ្វើជានាយករដ្ឋមន្រ្តីនៃព្រះរាជាណាចក្រកម្ពុជាបន្តទៀត ដែលការទូងគងជ័យនេះត្រូវបានធ្វើឡើង ខណៈពេលឯកឧត្តម អ៊ុន ចាន់ដា អភិបាលខេត្តព្រះវិហារ អញ្ជើញ ឡើងមកលើខ្នងភ្នំត្បែងមានជ័យ ដើម្បីអុជធូបថ្លែងអំណរគុណ ដល់ម្ចាស់ទឹកម្ចាស់ដី ដែលមានបារមីស័ក្កសិទ្ធ ខ្លាំងពូកែ គង់នៅថែរក្សាមន្រ្តីរាជការ កងកម្លាំងនិងប្រជាពលរដ្ឋនៅក្នុងខេត្តព្រះវិហារ ក៏ដូចជាប្រជាពលរដ្ឋខ្មែរទូទាំងប្រទេស ឲ្យជួបតែសេចក្តីសុខសាន្ត ប្រទេសជាតិរីកចំរើននិងការអភិវឌ្ឍន៍ ក្រោមការដឹកនាំរបស់សម្តេចតេជោ ហ៊ុន សែន ប្រមុខដឹកនាំដ៏ឈ្លៀសវៃនៃដែនដីខ្មែរសុវណ្ណភូមិ។
ក្នុងការធ្វើដំណើរឡើងមកខ្នងភ្នំត្បែងមានជ័យនេះ មានកងកម្លាំងប៉ូលិស ប៉េអ៊ឹម និងមន្ទីរមួយចំនួននិងនិសិត្សចូលរួមដំណើរជាង៦០នាក់ មកវត្តដំបូកខ្មៅ និង វត្តល្អាងថ្មបីដុំ រួមទាំងទឹកជ្រោះបេងកោង ដែលមានទេសភាពដ៏ស្រស់ស្អាតកំពុងតែលាក់ខ្លួននៅលើខ្នងភ្នំត្បែងមានជ័យ នៃខេត្តព្រះវិហារ ។ នៃឳកាសនេះដែរ ឯកឧត្តម អ៊ុន ចាន់ដា បានបំផុសចលនារបស់និសិត្សឲ្យចូលរួមសំអាតបរិស្ថាន រើសសំរាម នៅជុំវិញទីតាំងលើខ្នងភ្នំ ។
ឯកឧត្តម អ៊ុន ចាន់ដា អភិបាលខេត្តព្រះវិហារ បានសំណូមពរដល់អ្នកទេសចរណ៍ជាតិនិងអន្តរជាតិ ដែល បានអញ្ជើញមកកំសាន្ត ឬមកធ្វើបុណ្យ សូមឲ្យជួយគ្នាថែរក្សាទីតាំងទេសចរណ៍ ឲ្យមានបរិស្ថានល្អ បរិភោគ អាហារឲ្យមានការវិចខ្ចប់កាកសំណល់ចោលក្នុងធុងសំរាម ដោយមិនត្រូវចោលដោយគ្មានសណ្តាប់ធ្នាប់ឡើយ បរិស្ថានល្អគឺកើតចេញពីខ្លួនយើងជាអ្នកចាប់ផ្តើមមុនគេ គឺដើម្បីទាក់ទាញអ្នកទេសចរណ៍មកកំសាន្តឲ្យកាន់តែច្រើន ៕
