យោងតាមបណ្តាញពត័មានក្នុងស្រុកបានឲ្យដឹងថា ក្រុមជនសង្គមងងិតជនជាតិចិនតៃវ៉ាន់មួយក្រុមមានគ្នា៤នាក់ បានធ្វើសកម្មភាពហឹង្សាមានស្ថានទម្ងន់ទោស កំហែងយកនិងប្លន់យករថយន្តជនរងគ្រោះម៉ាកMecedez យកទៅលាក់ទុកនៅ Condo ក្រោយណាហ្គាក្នុងខណ្ឌចំការមន រាជធានីភ្នំពេញ។
ជនសង្ស័យឈ្មោះ Yang Shi Xiao ជាមេខ្លោងក្នុងការធ្វើសកម្មភាពត្រូវបានកម្លាំងកងរាជអាវុធហត្ថលើផ្ទៃប្រទេស ចាប់ខ្លួនថ្ងៃ២៧ ខែកក្កដា ឆ្នាំ២០១៨ ពីបទហឹង្សាដោយចេតនាមានស្ថានទម្ងន់ទោស និងកំហែងយក កាលពីថ្ងៃទី២៣ ខែកក្កដា ២០១៨ វេលាម៉ោង១០,០០នាទី នៅផ្ទះលេខ១៣ ផ្លូវលេខ៣(បូរីភ្នំពេញថ្មី) សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ (ផ្ទះជនរងគ្រោះ)។
ក្រុមនេះមានបក្ខពួក៤នាក់ចូលក្នុងផ្ទះជនរងគ្រោះ ប្រើអំពើហឹង្សាបង្ករបួសស្នាម ដោយយកពែងតែគប់ទៅលើជនរងគ្រោះរងរបួសក្បាល និងយកវត្ថុរឹងគំរាមបង្ខំអោយជនរងគ្រោះចុះហត្ថលេខាលើលិខិតឲ្យទទួលស្គាល់ជំពាក់លុយពួកគេចំនួន ២២ម៉ឺនដុល្លារ និងបញ្ចាំរថយន្ត ដោយជនរងគ្រោះមិនបានជំពាក់លុយពួកគេផង ទើបមិនព្រមចុះហត្ថលេខាលើឯកសារនោះ។
ភ្លាមនោះពួកគេបានលើកថូផ្កាធំបំរុងគប់ទៅលើជនរងគ្រោះដោយពេលនោះស្ថានភាពពោរពេញដោយភាពភ័យខ្លាច ជនរងគ្រោះក៏ព្រមចុះហត្ថលេខា។ បន្ទាប់មកក្រុមជនសង្ស័យបានបង្ខំឲ្យជនរងគ្រោះយកសោរថយន្ត បណ្ណសម្គាល់យានយន្ត និងយករថយន្តជនរងគ្រោះចេញទៅលាក់ទុកនៅកន្លែងមួយជិតណាហ្គា។
ករណីនេះត្រូវបានកងរាជអាវុធហត្ថលើផ្ទៃប្រទេសកសាងសំណុំរឿងបញ្ជូនទៅតុលាការ ដោយចោទពីបទហឹង្សាដោយចេតនាមានស្ថានទម្ងន់ទោស និងកំហែងយកប៉ុន្តែត្រូវបានព្រះរាជអាជ្ញារង សឿ ឡង់ឌី បានចោទប្រកាន់តែមួយបទល្មើស គឺហឹង្សាដោយចេតនាមានស្ថានទម្ងន់ទោស បញ្ជូនទៅចៅក្រមស៊ើបសួរ ហេង កេសរោ ក៏បានដោះលែងជនល្មើសឈ្មោះ Yang Shi Xiao ដែលជាមេខ្លោងក្រុមជនសង្គមងងឹតរូបនេះអោយមានសេរីភាព ទាំងបក្ខពួក៣នាក់ទៀតកំពុងរត់គេចខ្លួនមិនទាន់ចាប់បាននៅឡើយ។ការសម្រេចមិនប្រក្រតីរបស់ចៅក្រមហេង កេសរោ ធ្វើឲ្យជនរងគ្រោះនិងក្រុមគ្រួសារមិនហ៊ានចូលស្នាក់នៅផ្ទះរបស់ខ្លួនបន្តទៀត ព្រោះមានការភ័យខ្លាចពីសុវត្ថភាព៕
