ខេត្តរតនគិរី ៖ ក្រោយការបោះឆ្នោតជាសកលអាណត្តិទីប្រាំមួយបានបញ្ចប់មិនទាន់បានមួយថ្ងៃផង ក្រុមឈ្មួញរកស៊ីឈើខុសច្បាប់ជាច្រើននាក់ បាននឹងកំពុងសំរុកដឹកជញ្ជូនឈើឆ្លងដែនយ៉ាងអាណាធិបតេយ្យ ពីក្រុង បានលុង និងតាមបណ្ដាស្រុកនានានៅខេត្តរតនគីរី ទៅលក់នៅប្រទេសវៀតណាម តាមច្រកអូយ៉ាដាវដោយសេរី ជាក់ស្ដែងឈ្មួញដែលសកម្មមានឈ្មោះ ទូច និងប្រពន្ធឈ្មោះចែណាត បានប្រើប្រាស់រថយន្តសាំងយ៉ុងពីរគ្រឿង ពាក់ស្លាកលេខកំពង់ចាម2A 5588 (សង្ស័យក្លែងក្លាយ) ព័ណស ដឹកជញ្ជូនឈើទាំងថ្ងៃទាំងយប់ ដោយមិនមានសមត្តកិច្ចជំនាញ ហ៊ានធ្វើការបង្ក្រាបនោះឡើយ។
គួរបញ្ជាក់ផងដែរថា កាលពីពេលថ្មីៗនេះមុនថ្ងៃបោះឆ្នោត មានការបង្ក្រាបចាប់រថយន្តដឹកឈើខុសខ្បាប់របស់ចែណាតម្ដងរួចមកហើយ ពីសំណាក់លោក ទន់ វិរៈភាព ជំនាញរដ្ឋបាលព្រៃឈើស្រុកអូរជុំ តែឈ្មួញខាងលើពីរនាក់ប្ដីប្រពន្ឋ មិនខ្លាចញញើតសោះឡើយ ថែមទាំងបានជេរប្រមាទយ៉ាងចាស់ដៃទៅលើមន្ត្រីជំនាញថែមទៀតផង ទាំងខ្លួនជាជនល្មើសរកស៊ីរបរខុសច្បាប់ រួចមិនទាន់បានប៉ុន្មានថ្ងៃផង មេឈ្មួញខាងលើនៅតែអាចបន្តដឹកជញ្ជូនឈើឆ្លងដែនខុសច្បាប់បានដដែល
ធ្វើអោយមានការិះគន់ពីសំណាក់មហាជន ប្រជាពលរដ្ឋថា ការបង្ក្រាបនោះដោយសារតែឈ្មួញរកស៊ីឈើ មិនបានបង់លុយចាស់អស់ ឬមិនទាន់បានបង់លុយខែថ្មីអោយមន្ត្រីជំនាញខាងលើ ទើបមានការបង្ក្រាបយ៉ាងដូច្នេះ
គួរតែខាងស្ថាប័នពាក់ពន្ធ័ក្នុងខេត្តទាំងអស់ គួរមានចំណាត់ការទៅលើឈ្មួញខាងលើពីរនាក់ប្ដីប្រពន្ធ កុំអោយបង្កព្យុះភ្លៀងតាមតែអំពើចិត្ត អាងមានអ្នកធំនៅពីក្រោយខ្នង អាងថាខ្លួនមានលុយ នាំអោយជះឥទ្ធិពលអាក្រក់ ដល់សង្គមជាតិថែមទៀតផង។
បញ្ហាខាងលើក៏មិនមែនមានតែឈ្មួញពីរនាក់ប្ដីប្រពន្ធនោះទេ នៅមានឈ្មួញដូចជាឈ្មោះ នី នៅកាចាញ ប្រើរថយន្ត សាំងយ៉ុង ស្លាកលេខ 0808 និងឈ្មួញឈ្មោះ ទូច ប្រើរថយន្តសាំងយ៉ុងជាច្រើនគ្រឿងពាក់ស្លាកលេខ 0909និងមានឈ្មួញជាច្រើននាក់ទៀត កំពុងធ្វើសកម្មភាពដឹកជញ្ជូនឈើខុសច្បាប់ចេញទៅប្រទេសវៀតណាមតាមច្រកអូរយ៉ាដាវយ៉ាងគឃ្លើនថែមទៀតផង។
គេហទំពរ័យើង ពុំអាចសុំការបំភ្លឺពីភាគីពាក់ពន្ធ័បានឡើយ តែនិងព្យាយាមស្រាវជ្រាវបន្តទៀត នូវពត័មានការដឹកជញ្ជូនឈើអត់ច្បាប់របស់ពួកឈ្មួញដុះស្លែខាងលើ៕
