រាជធានីភ្នំពេញ ៖ ព្រឹកថ្ងៃសុក្រ ១៥កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែកក្កដា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានអញ្ជើញចូលរួមក្នុងពិធីបិទយុទ្ធនាការឃោសនាបោះឆ្នោតជ្រើសរើសតំណាងរាស្ត្រនិតិកាលទី៦ ឆ្នាំ២០១៨ ដែលធ្វើឡើងនៅសួនច្បារមុខវត្តបទុមវត្តី រាជធានីភ្នំពេញដែលមានសមាជិក សមាជិកា គណបក្សប្រជាជនកម្ពុជារាជធានីភ្នំពេញ រាប់ម៉ឺននាក់ចូលរួមដង្ហែរថ្ងៃបញ្ចប់ក្បួនយុទ្ធនាការឃោសនាបោះឆ្នោតជ្រើសរើសតំណាងរាស្ត្រនិតិកាលទី៦ ឆ្នាំ២០១៨។ សម្តេចតេជោមានប្រសាសន៏ថា សូមបងប្អូនទៅបោះឆ្នោតគាំទ្រ គណបក្សប្រជាជន របស់យើងទាំងអស់គ្នា ដែលមានលេខរៀងទី២០ អោយបានគ្រប់ៗគ្នា។
មួយវិញទៀត យោងតាមហ្វេសប៊ុក សម្តេច ហ៊ុន សែន បានអំពាវនាវសូមបងប្អូនជនរួមជាតិរក្សាភាពស្ងប់ស្ងាត់នៅថ្ងៃស និងថ្ងៃបោះឆ្នោតចាប់ពីម៉ោង១២យប់នេះនៅថ្ងៃនេះ គណកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវគ្រប់គណបក្សនយោបាយ, បេក្ខជន, ភ្នាក់ងារគណបក្សនយោបាយ, អ្នកគាំទ្រគណបក្សនយោបាយ រួមនឹងអ្នកគ្រប់គ្រងបណ្តាញផ្សព្វផ្សាយព័ត៌មានគ្រប់ប្រភេទ ត្រូវរក្សាភាពស្ងប់ស្ងាត់ នៅថ្ងៃស និងថ្ងៃបោះឆ្នោត។
យោងតាមមាត្រា៧២ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ សកម្មភាពឃោសនាបោះឆ្នោតត្រូវបញ្ឈប់២៤ម៉ោង មុនថ្ងៃបោះឆ្នោត ចាប់ពីម៉ោង១២: ០០យប់ ថ្ងៃទី២៧ (យប់នេះ) រហូតដល់ម៉ោង១២: ០០យប់ ថ្ងៃទី២៩ ខែកក្កដា ឆ្នាំ២០១៨។
នៅក្នុងថ្ងៃបោះឆ្នោត សូមបងប្អូនកុំពាក់ខោអាវបក្ស ឬជិះរថយន្ត,ម៉ូតូ,ស៊ីក្លូ, រឺម៉កកង់បី, ទុកទុក ឬកោរសក់ឬគូសរូបជាផ្លាកសញ្ញា ឬជាលេខរៀងគណបក្ស ព្រោះ គ.ជ.ប មិនអនុញ្ញាត្តិអោយចូលបោះឆ្នោតឡើយ។
នៅថ្ងៃទី២៧ ខែកក្កដា ឆ្នាំ២០១៨នេះ គណកម្មាធិការជាតិរៀបចំការបោះឆ្នោត ( គ.ជ.ប ) បានចេញសេចក្តីអំពាវនាវមួយដល់គ្រប់គណបក្សនយោបាយ បេក្ខជន ភ្នាក់ងារគណបក្សនយោបាយ អ្នកគាំទ្រគណបក្សនយោបាយ រួមនឹងអ្នកគ្រប់គ្រងបណ្តាញផ្សព្វផ្សាយព័ត៌មានគ្រប់ប្រភេទ ត្រូវរក្សាភាពស្ងប់ស្ងាត់ នៅថ្ងៃស និងថ្ងៃបោះឆ្នោត ៕
