ខេត្តកំពត ៖ ទូកយន្តលួចដឹកឈើប្រណិតប្រមាណ៣ទូកុងតឺន័រ ផ្ទុកឈើ៥៣ដុំធំៗ ដែលបម្រុងលោតឆត្រ័ឆ្លងដែនទៅប្រទេសវៀតណាម ហើយបានលិច ត្រូវបានកម្លាំងគយសហការជាមួយកម្លាំងកងរាជអាវុធហត្ថខេត្ត បានបើកប្រតិបត្តិការបង្ក្រាប ខណៈដែលការបង្ក្រាបនេះធ្វើឡើងនៅចម្ងាយ៣គីឡូម៉ែត្រពីផែព្រែកត្នោត ខេត្តកំពត។
ក្រុមមន្ត្រីអះអាងថា ប្រតិបត្តិការនោះធ្វើឡើង បន្ទាប់ពីសមត្ថកិច្ចគយទទួលបានព័ត៌មាននៃករណីបទល្មើសខាងលើ ហើយបានបញ្ជូនកម្លាំងចុះត្រង់ចំណុចភូមិសាស្ត្រខាងលើ ក៏ប្រទះឃើញទូកយន្តឈើមួយគ្រឿងកំពុងលិចនៅក្នុងផ្ទៃទឹក ដែលមានជម្រៅប្រហែលបីម៉ែត្រ ។ ខណនោះកម្លាំងសមត្ថកិច្ចក៏ចុះឆែកឆេរ ប៉ុន្ដែពុំឃើញមាននរណាម្នាក់នៅលើទូកនោះឡើយ ឃើញតែទូកុងតឺន័រចំនួនបីគត់ បន្សល់ទុកឈើក្នុងទូកនោះក៏បានធ្វើការរិបអូសតែម្តង ៕
