រាជធានីភ្នំពេញ ៖ នៅពហុកីឡដ្ឋានជាតិអូឡាំពិក នាល្ងាចថ្ងៃអាទិត្យ ទី១៥ ខែកក្កដា ឆ្នាំ២០១៨ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចគតិព្រឹទ្ធបណ្ឌិត ប៊ុនរ៉ានី ហ៊ុនសែន បានអញ្ជើញចូលរួមអបអរសាទរខួប១០ឆ្នាំនៃការដាក់បញ្ចូលប្រាសាទព្រះវិហារ ក្នុងបញ្ជីបេតិកភណ្ឌពិភពលោក (៧ កក្កដា ២០០៨-៧ កក្កដា ២០១៨) និងខួប១ឆ្នាំនៃការដាក់បញ្ចូលតំបន់ប្រាសាទសំបូរព្រៃគុកជាសម្បត្តិបេតិកភណ្ឌពិភពលោក (៨ កក្កដា ២០១៧-៨ កក្កដា ២០១៨)។
ពិធីនេះក៏មានការអញ្ជើញចូលរួមពីមន្ត្រីរាជការ អង្គទូត កងកម្លាំងប្រដាប់អាវុធ សិស្សនិស្សិត និងប្រជាពលរដ្ឋរាប់ពាន់នាក់ និងមានការសម្តែងសិល្បៈជាច្រើនប្រភេទផងដែរដូចជា របាំបុរាណ ចម្រៀងពង្សសាវតាខ្មែរ ចម្រៀងបុរាណ សម័យ និងសិល្បៈខ្មែរជាច្រើនទៀត ។
ជាមួយនិងការសំដែងនូវការរីករាយអបអរសាទរសារជាថ្មីចំពោះការដាក់បញ្ចូលប្រាសាទព្រះវិហារ និងតំបន់ប្រាសាទសំបូរព្រៃគុក នៅក្នុងបញ្ជីបេតិកភណ្ឌពិភពលោក សម្តេចតេជោ នាយករដ្ឋមន្ត្រី បានថ្លែងអំណរព្រះគុណនឹងបានដឹងគុណចំពោះអតីតព្រះមហាក្សត្រខ្មែរ ដែលបានកសាងប្រាង្គប្រាសាទជាច្រើនទុកសំរាប់កូនខ្មែរគ្រប់ៗជំនាន់ និងអរគុណដល់ សម្តេចព្រះបរមរតនកោដ្ឋ សម្តេចព្រះ នរោត្តម សីហនុ ដែលព្រះអង្គបានទាមទារតុលាការអន្តរជាតិទីក្រុងឡាអេ ថ្ងៃទី១៥ ខែមិថុនា ឆ្នាំ១៩៦២ ទទួលបានមកវិញនូវប្រាសាទព្រះវិហារខ្មែរពីប្រទេសថៃ។
សម្តេចតេជោ បានអរព្រះគុណរចំពោះ សម្តេចព្រះនរោត្តម សីហមុនី ព្រះមហាក្សត្រជាទីសក្ការៈ ដែលព្រះអង្គតែងតែយកព្រះទ័យទុកដាក់ចំពោះវប្បធម៌ជាតិខ្មែរ និងបានបញ្ជាក់សារជាថ្មីថា កម្ពុជាដែលបានសម្រេចដាក់ប្រាសាទព្រះវិហារ ទៅក្នុងបញ្ជីបេតិកភណ្ឌពិភពលោក ដើម្បីរក្សាឲ្យបាននូវទ្រព្យសម្បត្តិរបស់កម្ពុជាដែលបន្សល់ទុកដោយដូនតា ដល់មនុស្សជាតិទាំងឡាយ មិនអនុញ្ញាតឲ្យនរណាមកឈ្លានពានយកទឹកដីកម្ពុជា សូម្បីតែមួយមីល្លីម៉ែត្រនោះឡើយ ។
សម្តេចនាយករដ្ឋមន្ត្រី បានចាត់ទុកពិធីអបអរសាទរថ្ងៃនេះ គឺជាការរំលឹក និងដឹងគុណដល់បុព្វបុរសខ្មែរ ដែលបានបន្សល់ទុកស្នាដៃដ៏មហស្ចារ្យសម្រាប់ជាតិខ្មែរ។ សម្តេចតេជោក៏បានមានប្រសាសន៍រំលឹកផងដែរ អំពីយុទ្ឋសាស្ត្រដឹកនាំប្រទេសជាតិលើយុទ្ឋសាស្ត្រអាទិភាពសំខាន់២ ដែលនាំសេចក្តីសុខដល់កម្ពុជាផង និងប្រទេសជិតខាងផង គឺទី១ប្រែក្លាយតំបន់សមរភូមិក្តៅអោយទៅជាកន្លែងដែលមានសន្តិភាពនិងការអភិវឌ្ឍ និងទី២គឺប្រែក្លាយតំបន់ព្រំដែននៃប្រទេសជិតខាងទៅជាកន្លែងដែលមានកិច្ចសហប្រតិបត្តិការ និងអភិវឌ្ឍន៍រីកចម្រើនគ្រប់វិស័យ ។
សម្តេចតេជោនាយករដ្ឋមន្រ្តីបានអំពាវនាវអោយប្រជាពលរដ្ឋទាំងអស់ ចូលរួមថែរក្សាការពារប្រាង្គប្រាសាទទាំងអស់ ដែលត្រូវបានដាក់បញ្ចូលជាសម្បត្តិបេតិកភ័ណ្ឌពិភពលោក រួមទាំងសម្បត្តិវប្បធម៌ផ្សេងៗរបស់ប្រទេសជាតិជាច្រើនទៀត។
សម្តេចតេជោ ហ៊ុន សែន នាយករដ្ឋមន្រ្តី ក៏បានជូនពរដល់ប្រជាពលរដ្ឋ និងជនរួមជាតិទាំងអស់ ជួបតែសេចក្តីសុខ ចម្រើនគ្រប់ៗគ្នា។ បន្ទាប់មក សម្តេចតេជោ ប្រមុខដឹកនាំ និងសម្តេចកិត្តិព្រឹទ្ធបណ្ឌិត បានអញ្ជើញទស្សនាការសម្តែងសិល្បៈ រហូតដល់ចប់កម្មវិធី៕
