រាជធានីភ្នំពេញ ៖ សមាជិក សមាជិកា គណបក្សប្រជាជនកម្ពុជា រាប់ពាន់នាក់បានមកជួបជុំគ្នានៅបរិវេណមជ្ឈមណ្ឌលសន្និបាតនិងពិព័រណ៍កោះពេជ្រ ដើម្បីចូលរួមក្បួនយុទ្ធនាការធំលើកទី២ ក្នុងរាជធានីភ្នំពេញ នៅព្រឹកថ្ងៃសៅរ៍ទី១៤ ខែកក្កដា ឆ្នាំ២០១៨។
នាព្រឹកថ្ងៃសៅរ៍ ទី១៤ ខែកក្កដា នេះក្រោយការជួបជុំនៅបរិវេណមជ្ឈមណ្ឌលសន្និបាតនិងពិព័រណ៍កោះពេជ្រ ក្បួនឃោសនាបោះឆ្នោតរបស់គណបក្សប្រជាជនកម្ពុជា នៅរាជធានីភ្នំពេញ ដឹកនាំដោយលោក អ៊ិត សំហេង លោក ប៉ា សុជាតិវង្ស និងលោក ឃួង ស្រេង បានហែក្បួនតាមផ្លូវនានាក្នុងរាជធានីភ្នំពេញ។ រីឯសាខាគណបក្សប្រជាជនកម្ពុជា តាមខណ្ឌនីមួយៗ ក៏បានហែក្បួនឃោសនាតាមមូលដ្ឋានរបស់ខ្លួន ដោយមានអ្នកចូលរួមជាច្រើននាក់ ។
សូមជម្រាបថា ដំណើរការឃោសនាបោះឆ្នោត បានចាប់ផ្តើមកាលពីថ្ងៃទី០៧ ខែកក្កដា ឆ្នាំ២០១៨ បន្តរហូតដល់ថ្ងៃទី២៧ ខែកក្កដា ឆ្នាំ២០១៨៕
