ខេត្តស្ទឹងត្រែង ៖ ប្រជាពលរដ្ឋឲ្យដឹងថា មន្ត្រីជំនាញរដ្ឋបាលព្រៃឈើតាមគោលដៅជាច្រើនកន្លែង ពិសេសប្រធានមន្ទីរកសិកម្មខេត្តស្ទឹងត្រែង ដែលមានលោក លៀង សេង ជាថ្នាក់លើរបស់ជំនាញរដ្ឋបាលព្រៃឈើខេត្ត មិនបានចេញបញ្ជាទៅកាន់មន្រ្តីក្រោមឱវាទ អោយបង្ក្រាបបទល្មើសព្រៃឈើជាក់ស្តែងនោះទេ ដែលបទល្មើសជំនួញឈើឆ្លងដែនតែងតែមានសកម្មភាព ចេញពីតំបន់នៃស្រុកថាឡាបរិវ៉ាត់ ខេត្តស្ទឹងត្រែង ដឹកឆ្ពោះទៅកាន់ខេត្តក្រចេះ ខេត្តត្បូងឃ្មុំនិងខេត្តព្រៃវែង ដោយប្រើប្រាស់រថយន្តសាំយ៉ុងកង់ឌុបជាច្រើនគ្រឿង បើទោះជាមានការរាយការណ៏ពីប្រជាជនយ៉ាងណាក៏ដោយ ហើយគេសង្ស័យតែប្រធានមន្ទីរកសិកម្មខេត្តនិងមន្រ្តីរដ្ឋបាលព្រៃឈើស្រុកថាឡាបរិវ៉ាត់ មានការត្រូវរ៉ូវសម្របសម្រួលគ្នាជាប្រព័ន្ធជាមួយឈ្មួញ ទើបមើលមិនឃើញនិងមិនបង្ក្រាបបទល្មើសដឹកជញ្ជូនឈើខុសច្បាប់ជាក់ស្តែងដែលកើតមានឡើងនៅក្នុងមូលដ្ឋានរបស់ខ្លួន។
បទល្មើសព្រៃឈើខាងលើត្រូវក្រុមឈ្មួញបានរៀបចំលើកឈើឡើងទុកដាក់ក្នុងរថយន្តសាំយ៉ុងកង់ឌុបយ៉ាងពេញប្រៀប និងដាក់លើដំបូលថែមទៀតជាច្រើនគ្រឿង កាលពីយប់ថ្ងៃទី៩ កក្កដា ២០១៨ ស្ថិតមុខវត្តវាលដេញ និងនៅផ្ទះអ្នកភូមក្បែរប៉ុស្តិ៏នគរបាលអន្លង់ជ្រៃ ក្នុងភូមិវាលដេញ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង។
ប្រភពពីចំនុចខាងលើបានអោយដឹងថា ឈ្មួញដែលបានទិញឈើខុសច្បាប់ ហើយដឹកជញ្ជូនទៅកាន់ខេត្តផ្សេងៗត្រូវបានគេស្គាល់ឈ្មោះ ពៅ និងឈ្មោះ ហាក់ គឺជាមេឈ្មួញជើងខ្លាំងដុះស្លែនៅខេត្តស្ទឹងត្រែង គ្មានមន្រ្តីជំនាញណាហ៊ានបង្ក្រាប សូម្បីតែប្រធានមរកសិកម្មខេត្ត ក៏មិនអាចបង្ក្រាបបាន បើទោះបីប្រធានមន្ទីរបានទទួលការរាយការណ៏ច្បាស់លាស់ពីប្រភពបទល្មើសខាងលើយ៉ាងណាក៏ដោយ ។
សេចក្តីរាការណ៏អោយដឹងថា បទល្មើសជាក់ស្តែងនៅយប់ថ្ងៃទី៩ កក្កដា មិនត្រូវបានត្រូវបានបង្ក្រាបនោះទេ បន្ទាប់ប្រធានមន្ទីរកសិកម្មខេត្តស្ទឹងត្រែងបានទទួលពត័មានច្បាស់ការណ៏ខាងលើរួចហើយ ថាមានបទល្មើសព្រៃឈើខុសច្បាប់កំពុងតែលើកឈើឡើងលើរថយន្តសាំយ៉ុងកង់ឌុបជាច្រើនគ្រឿង នៅចំណុចមុខវត្តវាលដេញ ក្នុងស្រុកថាឡាបរិវ៉ាត់ ហើយអ្វីដែលគួរអោយចាប់អារម្មណ៏នោះ ក្រោយពីលោកប្រធានមន្ទីរកសិកម្មខេត្តស្ទឹងត្រែងទទួលបានពត៍មានហើយនោះ ស្រាប់តែក្រុមឈ្មួញបានចាប់ផ្តើមធ្វើសកម្មភាពទំលាក់ឈើពីលើរថយន្តកង់ឌុបទាំងនោះចុះវិញ ខណៈដែលពួកគេបានរៀបចំឈើពេញប្រៀបរួចហើយបម្រុងនិងដឹកជញ្ជូនយកចេញទៅក្រៅខេត្ត។
ជុំវិញបញ្ហារថយន្តសាំយ៉ុងកង់ឌុបផ្ទុកឈើពេញប្រៀបនៅចំនុចមុខវត្តវាលដេញ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង លោក លៀង សេង ប្រធានមន្ទីរកសិកម្មខេត្តស្ទឹងត្រែងបានឆ្លើយតបតាមទូរស័ព្ទប្រាប់អ្នកកាសែតកាលពីយប់ថ្ងៃទី៩កក្កដានេះថា កម្លាំងរបស់លោកមិនបាច់ទៅទេ ដោយរង់ចាំអោយរថយន្តសាំយ៉ុងដឹកឈើនោះចេញមកសិនទៅ។ ទាក់ទិននិងករណីនេះ លោកប្រធានមន្ទីរកសិកម្មខេត្តស្ទឹងត្រែង រងការរិះគន់ថា អាចនិងត្រូវដងត្រូវផ្លែជាមួយក្រុមឈ្មួញ ទើបលោកប្រធានមន្ទីរកសិកម្មទទួលពត៍មានបានភា្លមៗ ស្រាប់តែក្រុមឈ្មួញជាម្ចាស់រថយន្តទាំងនោះហាក់ដូចជាដឹងខ្លួនមុន ទើបនាំគ្នាទម្លាក់ឈើចេញពីលើរថយន្តអស់។
សូមបញ្ជាក់ផងដែរថា នៅក្នុងទឹកដីស្រុកថាឡាបរិវ៉ា់ត់ គេឃើញមានមន្ត្រីសង្កាត់រដ្ឋបាលព្រៃឈើជាច្រើននាក់ដែលនៅក្រោមឱវាទរបស់លោកនាយខណ្ឌរដ្ឋបាលព្រៃឈើ និងប្រធានមន្ទីកសិកម្មខេត្ត តែកម្រឃើញមានការបង្រ្កាបបទល្មើសព្រៃឈើ ទើបពួកឈ្មួញរកស៊ីបានយ៉ាងរលូន។
យើងពុំអាចសុំការបំភ្លឺពីលោកប្រធានមន្ទីរកសិកម្មខេត្តស្ទឹងត្រែងបានទេ តែនិងព្យាយាមនៅពេលក្រោយ៕
