រាជធានីភ្នំពេញ ៖ កាលពីថ្ងៃទី៤ ខែកក្កដា ឆ្នាំ២០១៨ នៅទីស្តីការក្រសួងព័ត៌មាន ឯកឧត្តម ផុស សុវណ្ណប្រតិភូរាជរដ្ឋាភិបាលទទួលបន្ទុកអគ្គនាយកព័ត៌មាននិងសោតទស្សន៍ នៃក្រសួងព័ត៌មាន នៅក្នុងសិក្ខាសាលាផ្សព្វផ្សាយប្រកាសអន្តរក្រសួង ស្តីពីការគ្រប់គ្រងប្រពន្ធ័ផ្សព្វផ្សាយតាមគេហទំព័រ និងបណ្តាញទំនាក់ទំនងសង្គម ដែលដំណើរការតាមប្រព័ន្ធអ៊ិនធើណិតនៅកម្ពុជា និងលិខិតបទដ្ឋានគតិយុត្តនានាពាក់ព័ន្ធនឹងប្រព័ន្ធផ្សព្វផ្សាយ បានបញ្ជាក់ថា ក្នុងគោលបំណងគ្រប់គ្រងប្រព័ន្ធផ្សព្វផ្សាយរាល់ខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ ឬទម្រង់ផ្សេងៗតាមគេហទំព័រ និងបណ្តាញទំនាក់ទំនងសង្គម ដែលដំណើរការតាមប្រពន្ធ័អ៊ិនធើណិតនៅព្រះរាជាណាចក្រកម្ពុជា ចាប់ពីថ្ងៃនេះទៅ ក្រសួងព័ត៌មាននឹងមានវិធានការចំពោះម្ចាស់ គេហទំព័រដែលមិនគោរពក្រមសីលធម៌សារព័ត៌មាន។
តាមទោសបញ្ញត្តិបទល្មើសក្លែងព័ត៌មាន(ក្រមព្រហ្មទណ្ឌ) មាត្រា ៤២៥ ត្រូវផ្តន្ទាទោសដាក់ពន្ធនាគារពី១(មួយ)ឆ្នាំ ទៅ២(ពីរឆ្នាំ) និងពិន័យជាប្រាក់ពីពីរលានរៀលទៅបួនលានរៀល អំពើផ្តល់ ឬបើកកកាយព័ត៌មានក្លែង ដើម្បីធ្វើឱ្យគេជឿថា នឹងមានកើតមានឡើងនូវការបំផ្លិចបំផ្លាញ ការធ្វើឱ្យទ្រុឌទ្រោម ឬការធ្វើឱ្យខូចខាតប្រកបដោយគ្រោះថ្នាក់ចំពោះមុខមនុស្ស។
សូមបញ្ជាក់ថា ប្រកាសអន្តរក្រសួងស្តីពីការគ្រប់គ្រងប្រពន្ធផ្សព្វផ្សាយតាមគេហទំព័រ និងបណ្តាញទំនាក់ទំនងសង្គម ដែលដំណើរការតាមប្រពន្ធ័អ៊ិនធើណិតនៅកម្ពុជារួមមាន ក្រសួងពត័មាន ក្រសួងមហាផ្ទៃ និងក្រសួងប្រែសនីយនិងទូរគមនាគមន៏ ៕
