ខេត្តកោះកុង ៖ លោក យួន ឈីវ អ្នកយកពត័មានឲ្យកាសែតថ្ងៃនេះ និងគេហទំព័រសម្លេងសច្ចៈ បានឲ្យដឹងថា អ្នកស្រីហុងមុំ ថៅកែចែកចាយទឹកស្អាតនៅឃុំថ្មស ស្រុកបូទុមសាគរ ខេត្តកោះកុង និងកូនឈ្មោះ ហៀក ស៊ាងឃួន បានរួមគំនិតគ្នាប៉ុនប៉ងធ្វើឃាតលើរូបលោក ដែលបានចុះយកពត៍មានតាមមូលដ្ឋាន។
កន្លងមកអ្នកកាសែតរូបនេះបានធ្វើការចុះផ្សាយពីរឿងទឹកស្អាតរបស់អ្នកស្រី ហុង មុំ ជាច្រើនដងមកហើយ ដោយសារទឹករបស់អ្នកស្រីហុងមុំនេះល្អក់ដូចផុកក្រីបីដេក តំលៃវិញថ្លៃខ្ពស់កប់ពពក គឺក្នុងមួយគីបទឺកថ្លៃ៤០០០រៀល ចំណែកកុងទ័រពេលបើកទឺកម្ដងៗចេញតែខ្យល់ទេ បុកឲ្យកុងទ័រ វិលឡើងគីឡូយ៉ាងខ្លាំង។
លោក យួន ឈីវ និយាយប្រាប់ឲ្យដឹងពីមូលហេតុ ប៉ុនប៉ងធ្វើឃាតលើរូបលោកថា នៅថ្ងៃទី២៥ ខែមិថុនា ឆ្នាំ២០១៨ លោកបានតេទៅអ្នកស្រី ហុង មុំ សួរគាត់ថា ចែកាលណាចែចុះថ្លៃទឹកជូនប្រជាពលរដ្ឋនៅក្នុងឃុំថ្មស ពេលនោះចែ ហុង មុំ និយាយខ្លាំងៗតាមទូរស័ព្ទគំរាមកំហែងរូបលោក មិនតែប៉ុណ្ណោះទេចែ ហុង មុំ បានឲ្យប្ដីនិយាយគំរាមយ៉ាងខ្លាំងៗថា ចង់សំលាប់អាហ្អែងទៀត នេះជាមូលហេតុទីមួយ។
លោក យួន ឈីវ ឲ្យដឹងទៀតថា មូលហេតុទី២គឺនៅព្រឹកថ្ងៃទី១ ខែកក្ដដា ២០១៨ ខ្ញុំបានឃើញលេខទូរស័ព្ទ០១២ ៣១៦៨៨៨ ជាប់ក្នុងទូរស័ព្ទរបស់ខ្ញុំ ហើយខ្ញុំក៍តេទៅវីញប្រហែលម៉ោង៧,៨ព្រឹក ពេលនោះអ្នកទទួលគាត់ថាគាត់ចែ ហុង មុំ ទឹក ហើយគាត់ប្រាប់ថា ពូឈីវ រឿងទឹករបស់ខ្ញុំចង់សួរអីសួរទៅមន្ទីរទៅ មិនបាច់សួរខ្ញុំទេ ពូឈីវឯងនេះចេះតែរករឿងខ្ញុំ ហើយក៏បឹតទូរស័ព្ទបាត់ ខ្ញុំបានតេទៅទៀតតែគាត់មិនលើកទេ។
មូលហេតុទី៣ បន្ទាប់មកប្រហែលម៉ោង៩ព្រឹកថ្ងៃដដែល ខ្ញុំបានជិះម៉ូតូតាមផ្លូវលំក្នុងភូមិស្រែត្រាវ ឃុំថ្មស ខ្ញុំឃើញមានឡានតាមពីក្រោយខ្ញុំ ដូចជាមិនស្រួលខ្ញុំមើលតាមកញ្ចក់ឃើញលេខឡានចែ ហុង មុំ ខ្ញុំក៏ឈប់ម៉ូតូហើយរត់ចុះមកព្រៃកោងកាង ស្រាប់តែកូនចែ ហុង មុំ ឈ្មោះ ហៀក ស៊ាងឃួន បានបើកទ្វារឡានចុះមកគំរាមកំហែងចង់សំលាប់ខ្ញុំ ហើយនិយាយថា កុំឲ្យរករឿងម៉ែរបស់គេពីរឿងទឹក បើមិនអញ្ចឹងទេប្រយ័ត្នខ្លួនទៅ។
សូមរំលឹកថា ប្រជាពលរដ្ឋនៅឃុំថ្មសទាំងអស់បានផ្ដឹតមេដៃតវ៉ាពីរឿងតម្លៃទឹកគីបរបស់អ្នកស្រី ហុង មុំ ឲ្យអាជ្ញាធរមូលដ្ឋានជួយដោះស្រាយ តែអាជ្ញាធរទាំងនេះ មិនដែលខ្វល់ពីរឿងប្រជាពលរដ្ឋជួបការលំបាកនេះទេ សព្វថ្ងៃប្រជាពលរដ្ឋអស់ទឹកចិត្តទៅលើអាជ្ញាធរឃុំស្រុកទាំងអស់។ប្រជាពលរដ្ឋបន្តថា អាជ្ញាធរទាំងអស់នេះ បើកន្លែងបានលុយចូលហោប៉ៅគឺនាំគ្នាមកហើយ ចំណែកទុក្ខលំបាករបស់ពលរដ្ឋអត់ខ្វល់បន្តិចសោះឡើយ។
ចំណែកអ្នកស្រី ហុង មុំ ជាថៅកែផ្គត់ផ្គង់ទឹកស្អាតនៅឃុំថ្មសបានធ្វើលិខិតកិច្ចសន្យានៅសាលាស្រុកថា និងចុះថ្លៃទឹកជូនពលរដ្ឋ តែរយៈពេល៤ឆ្នាំហើយអ្នកស្រី ហុង មុំ ពុំព្រមចុះថ្លៃទឹកសោះ។
លិខិតកិច្ចសន្យានោះក៍មានឈ្មោះ យួន ឈីវ ឈ្មោះ នាក់ ហង់ ជាតំណាងប្រជាពលរដ្ឋនៅឃុំថ្មសទាំងអស់ដែលពួកគាត់បានទុកចិត្ត តែអ្នកស្រី ហុង មុំ មិនបានគោរពតាមកិច្ចសន្យារបស់សាលាស្រុកបូទុមសាគរដែលឯកសារនោះលោកអភិបាលរងស្រុក លោក សួន ស៊ីថា ជាអ្នកចុះហត្ថលេខាក្នុងរឿងបញ្ចុះតម្លៃទឹករបស់អ្នកស្រី ហុង មុំ។
នៅក្នុងច្បាប់នៃព្រះរាជាណាចក្រកម្ពុជាបានចែងថា អ្នកណាដែលបានបំពានច្បាប់រដ្ឋត្រូវតែមានទោសជាប់គុក និងផាកពិន័យយ៉ាងធ្ងន់ចំពោះអ្នកមិនគោរពច្បាប់រដ្ឋ តួយ៉ាងដូចករណីអ្នកស្រី ហុង មុំ នេះជាដើម។
ចំណែកលោក ប៊ូ វាសនា ប្រធានការិយាលយ័រ៉ែថាមពលស្រុកបូទុមសាគរ និងលោក ពេជ្រ ស៊ីយ៉ុន ប្រធានមន្ទីររ៉ែថាមពលខេត្តកោះកុង មិនដែលខ្វល់ខ្វាយពីរឿងតម្លៃទឹកខ្ពស់កប់ពពកនិងមិនមានគុណភាពរបស់អ្នកស្រី ហុង មុំ ដែលធ្វើឲ្យប៉ះពាល់ដល់សុខភាពនិងសេដ្ឋកិច្ចប្រជាពលរដ្ឋឡើយ ទោះបីសារពត៍មានចុះផ្សាយរាប់មិនអស់ក៍លោក ពេជ្រ ស៊ីយ៉ុន មិនឈឺក្បាលទេ។ប្រជាពលរដ្ឋរិះគន់ថា ប្រធានមន្ទីររូបនេះដឹងតែប្រមូលលុយដាក់ហោប៉ៅធ្វើមានធ្វើបាន ហើយសេសសល់ប៉ុន្មានទុកទប់ស្កាត់ឲ្យលុយទៅមេខាងលើ ទើបរក្សាតំណែងយូរឆ្នាំយ៉ាងនេះសុទ្ធតែដុះស្លែហើយ។
ប្រជាពលរដ្ឋសំណូមពរសូមជំទាវ មិថុនា ភូថង អភិបាលខេត្តកោះកុង ជួយមើលលោក ពេជ្រ ស៊ីយ៉ុន និងអ្នកស្រី ហុង មុំ ដែលកំពុងធ្វើបាបខាងផ្លូវចិត្តប្រជាពលរដ្ឋនៅឃុំថ្មស ដោយសារទឹកថ្លៃកប់ពពក លោកជំទាវត្រូវតែប្រើដាវដែលសម្ដេចហ៊ុនសែនបានប្រគល់ឲ្យ កំចាត់ចោលមន្រ្តីគ្រាប់ល្ពៅ ត្រូវមើលប្រយោជន៏ប្រជាពលរដ្ឋជាធំ កុំឲ្យសម្ដេចតេជោ ហ៊ុន សែន ឈឺក្បាលវិលមុខដោយសារមន្រ្តីអសកម្មថ្នាក់ក្រោម។
ករណីខាងលើនេះ លោក យួន ឈីវ បានដាក់ពាក្យបណ្តឹងទៅអាជ្ញាធរមូលដ្ឋានរួចហើយ៕ដោយ យួន ឈីវ
