ខេត្តព្រៃវែង ៖ នៅថ្ងៃទី២៤ ខែកក្កដា ឆ្នាំ២០១៨ ឯកឧត្តមបណ្ឌឹត ញឹម វណ្ណដា ទេសរដ្ឋមន្ត្រី ទទួលបន្ទុកគ្រប់គ្រងគ្រោះមហន្តរាយធម្មជាតិ បានអញ្ជើញសំណេះសំណាលជាមួយព្រះសង្ឃ បងប្អូនប្រជាពលរដ្ឋ លោកគ្រូអ្នកគ្រូសិស្សានុសិស្សនៅអនុវិទ្យាល័យរំលេច ថិតនៅភូមិចារ ឃុំរំលេច ស្រុកស៊ីធរកណ្តាល ខេត្តព្រៃវែង ដែលបានធ្វើបុណ្យផ្កាសាមគ្គីនិងឆ្លងសមិទ្ធផលនានា ក្នុងសាលាអនុវិទ្យាល័យរំលេច ដើម្បីប្រមូលបច្ច័យយកមកកសាងរបងសាលាមានប្រវែង១៨០ម៉ែត្រ។
បន្ទាប់ពីនាយកអនុវិទ្យាល័យរំលេចបានអានសន្ទរកថាស្វាគមន៏ និងអានប្រវត្តិសាលាអនុវិទ្យាល័យរំលេច ព្រមទាំងការកសាងសមិទ្ធផលនានានៅក្នុងសាលារួចមក លោកអភិបាលស្រុកស៊ីធរកណ្តាលបានថ្លែងអំណរគុណចំពោះគណបក្សប្រជាជនកម្ពុជា ដែលបានជួយអភិវឌ្ឈន៏និងលើកកំពស់ជីវភាពប្រជាពលរដ្ឋ ជាពិសេសថែរក្សាសន្តិភាពដែលជាកត្តាចំបងសំរាប់ការកសាងជាតិ។
ឯកឧត្តមបណ្ឌឹត ញឹម វណ្ណដា ទេសរដ្ឋមន្ត្រី ទទួលបន្ទុកគ្រប់គ្រងគ្រោះមហន្តរាយធម្មជាតិ
និងជាអនុប្រធានក្រុមការងារថ្នាក់កណ្តាលចុះជួយខេត្តព្រៃវែង ក្នុងនាមសម្តេចតេជោ នាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា បានសម្តែងនូវការស្វាគមន៍យ៉ាងកក់ក្តៅ និងពាំនាំនូវក្តីនឹករលឹកចំពោះបងប្អូនប្រជាពលរដ្ឋ។
ឯកឧត្តមបណ្ឌឹត ញឹម វណ្ណដា បានបញ្ជាក់ថា សន្តិភាពដែលកម្ពុជាទទួលបានមកដល់សព្វថ្ងៃ គឺពិតជាបានកើតចេញពីការតស៊ូលះបង់ និងពលីកម្មធំធេងណាស់ដែលមិនអាចកាត់ថ្លៃបាន និងជាពិសេស គឺយកអាយុជីវិតធ្វើជាដើមទុនរបស់សម្តេចតេជោ ទម្រាំបង្កើតបាននូវសុខសន្តិភាពដូចសព្វថ្ងៃនេះ។ ដូច្នេះ យើងត្រូវការសម្តេចតេជោ ប្រធានគណបក្សប្រជាជនកម្ពុជាដើម្បីបន្តនូវការធានាបានយ៉ាងរឹងមាំនូវសុខសន្តិភាពនេះបានគង់វង្ស ទើបប្រទេសជាតិយើងមានឱកាសក្នុងការបន្តអភិវឌ្ឍបានកាន់តែរីកចម្រើនថែមទៀត។
ឯកឧត្តមបណ្ឌឹត ញឹម វណ្ណដា បានផ្តាំផ្ញើដល់ប្រជាពលរដ្ឋនៅឃុំរំលេចទាំងអស់ ត្រូវនាំគ្នាទៅបោះឆ្នោតជូនគណបក្សប្រជាជនកម្ពុជាកុំបីអាក់ខាន នៅថ្ងៃទី២៩ ខែកក្កដា ឆ្នាំ២០១៨ខាងមុខ ។
ឯកឧត្តមបន្តថា បើប្រជាពលរដ្ឋចង់រក្សាបាន នូវស្ថិរភាពនិងសន្តិភាពហើយបន្តមាននូវការអភិវឌ្ឍន៏ភូមិឃុំ គឺទៅបោះឆ្នោតជូនគណបក្សប្រជាជនកម្ពុជាដែលមានលេខរៀងទី២០ និងមានរូបទេវតាបាចផ្កាជាសញ្ញាសម្គាល់។
កន្លងមកក្រុមការងារថ្នាក់ជាតិចុះជួយឃុំរំលេច និងអ្នកតំណាងរាស្ត្រ ក៏ដូចជាក្រុមប្រឹក្សាឃុំ អាជ្ញាធរមូលដ្ឋានបានចូលរួមកសាងអភិវឌ្ឍក្នុងឃុំបានសម្រេចនូវសមិទ្ធផលច្រើនណាស់ ទាំងវិស័យពុទ្ធចក្រ និងអាណាចក្រ ដូចជាការជួសជុល និងកសាងផ្លូវក្នងឃុំបានជាច្រើនកន្លែង ដើម្បីសម្រួលដល់ការធ្វើដំណើររកទទួលទាន របស់ប្រជាពលរដ្ឋ បានចាក់ដីក្នុងអនុវិទ្យាល័យរំលេច បានប្រមូលគៀងគរ សប្បុរសជនជិតឆ្ងាយតាមរយៈការធ្វើបុណ្យផ្កាសាមគ្គី ដើម្បីប្រមូលថវិកាសាងសង់របងសាលា រួមទាំងបានចូលរួមក្នុងសកម្មភាពសង្គម មនុស្សធម៌ និងការអភិវឌ្ឍជាច្រើនទៀតក្នងឃុំ។
ឯកឧត្តមបណ្ឌឹត ញឹម វណ្ណដា បានឧបត្ថម្ភថវិកាសំរាប់ការសាងសង់របងសាលាអនុវិទ្យាល័យរំលេចនិងដោះស្រាយរាល់សំណូមពរដែលប្រជាពលរដ្ឋនិងព្រះសង្ឃបានលើកឡើង៕
