រាជធានីភ្នំពេញ ៖ កាលពីព្រឹកថ្ងៃច័ន្ទនេះ ថ្លែងនៅក្នុងពិធីសម្ពោធចំណតផែពហុបំណង នៃកំពង់ផែស្វយ័តក្រុងព្រះសីហនុមានតម្លៃជាង៧៤លានដុល្លារ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបន្តរិះគន់រឿងបំណុលរបស់អាមេរិក ក្នុងសម័យសាធារណរដ្ឋរបស់លោក លន់ នល់ ខណៈដែលសម្តេចចាត់ទុកបំណុលអាមេរិកដែលកម្ពុជាជំពាក់ថា ជាបំណុលកខ្វក់បំផុត។
សម្តេចតេជោ ហ៊ុន សែន បានថ្លែងថា កម្ចីរបស់កម្ពុជាដែលខ្ចីលុយអាមេរិកក្នុងសម័យសាធារណរដ្ឋរបស់លោក លន់ នល់ គឺជាបំណុលដែលគេចាប់បង្ខំឲ្យកម្ពុជាទិញគ្រាប់បែកមកទម្លាក់លើក្បាលខ្មែរ ហើយទាមទារឲ្យសងបន្ថែមទៀត ។ សម្តេចចាត់ទុកបំណុលនោះជាបំណុលកខ្វក់បំផុត ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និង លោក បេសសូ ខេនអ៊ិឈិ ភារធារីស្តីទីនៃស្ថានទូតជប៉ុន ប្រចាំនៅកម្ពុជា បានអញ្ជើញបើករបាំងស្បៃមុខសម្ពោធចំណតផែពហុបំណងនៃកំពង់ផែស្វយ័តក្រុងព្រះសីហនុ ដែលមានសមត្ថភាពដាក់ទំនិញរហូតដល់៥ម៉ឺនតោន ដាក់់អោយប្រើប្រាស់ជាផ្លូវការ នៅព្រឹកថ្ងៃចន្ទ ១៣កើត ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែមិថុនា ឆ្នាំ២០១៨ ៕
