រាជធានីភ្នំពេញ ៖ កាលពីវេលាម៉ោង៧និង៣០នាទី ថ្ងៃទី២១ ខែមិថុនា ឆ្នាំ២០១៨ ស្ថិតនៅចំណុចផ្ទះលេខ២អា និង៩អា ក្រុម៤ ភូមិ៤ សង្កាត់ច្រាំងចំរេះ១ ខណ្ឌឬស្សីកែវ រាជធានីភ្នំពេញ កម្លាំងសមត្ថកិច្ចចម្រុះខណ្ឌឬស្សីកែវ សហការជាមួយកម្លាំងការិយាល័យប្រឆាំងការជួញដូរមនុស្សនិងការពារអនិតិជន ក្រសួងមហាផ្ទៃ បានឆ្មក់បង្ក្រាបនិងឃាត់ខ្លួនមនុស្សជាង៤០នាក់ ដែលពាក់ព័ន្ធករណីបញ្ចូលមេជីវិតឲ្យពពោះ ចាប់បង្ខំស្ត្រីឲ្យមានកូនដោយសប្បនិម្មិត្ត។
ប្រតិបត្តិការខាងលើនេះ មានការសម្របសម្រួលពីព្រះរាជអាជ្ញារង កួច គឹមទ្បុង។ ជាលទ្ធផល ការបង្ក្រាបនេះសមត្ថកិច្ចឃាត់ខ្លូនបានជនសង្ស័យម្នាក់ឈ្មោះ LlU QlANG ភេទប្រុស អាយុ៤៩ឆ្នាំ ជនជាតិចិន និងស្ត្រីពពោះចំនួន៣៧នាក់ មេការ២នាក់ និងដកហូតរថយន្ត២គ្រឿង រួមមានរថយន្តឡិចស៊ីស 470 រថយន្តសាំយ៉ុង និងម៉ូតូ១គ្រឿងផងដែរ។
នៅចំពោះមុខ ជនសង្ស័យនិងស្ត្រីពពោះ មេការ និងរថយន្ត ត្រូវបានសមត្ថកិច្ចប្រគល់ទៅឲ្យការិយាល័យជួញដូរផ្លូវភេទដើម្បីចាត់ការបន្តតាមនីតិវិធី។ បច្ចុប្បន្នជនសង្ស័យនិងមេការ សមត្ថកិច្ចជំនាញកំពុងឃាត់ខ្លួននៅនាយកដ្ឋានប្រឆាំងការជួញដូរមនុស្សនិងការពារអនិតិជនក្រសួងមហាផ្ទៃ ដើម្បីធ្វើការសួរនាំនិងកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី៕
