ខេត្តរតនគិរី ៖ បើតាមសេចក្តីរាយការណ៏របស់ប្រជាពលរដ្ឋរស់នៅស្រុកអណ្តូងមាស ខេត្តរតនគិរី បានឲ្យដឹងថា រយៈពេលកន្លងមកនេះ មេឈ្មួញរកស៊ីឈើខុសច្បាប់ឈ្មោះ ស៊ី នឿន បានសម្រុកកាប់ឈើនិងដឹកជញ្ជូនឈើខុសច្បាប់ ចេញពីតំបន់ឧទ្យានវិរៈជ័យកន្ទុយនាគ ស្ថិតនៅស្រុកអណ្តូងមាស ទៅស្រុកយួនយ៉ាងគគ្រឹកគគ្រេង ហើយគ្មានមន្ត្រីជំនាញនិងសមត្ថកិច្ចពាក់ព័ន្ធណាហ៊ានប៉ះរោមជើងមេឈ្មួញរូបនេះឡើយ។
ប្រជាពលរដ្ឋនៅស្រុកអណ្តូងមាសរាយការណ៏ថា ព្រៃឈើនៅក្នុងតំបន់កន្ទុយនាគ កំពុងប្រឈមនឹងការកាប់បំផ្លាញយ៉ាងធ្ងន់ធ្ងរ ព្រោះមេឈ្មួញរកស៊ីជួញដូរឈើខុសច្បាប់ឈ្មោះ ស៊ី នឿនដែលកំពុងអាងអ្នកមានអំណាចមានលុយនៅពីក្រោយខ្នង បានបង្កើនសកម្មភាពកាប់ឈើ និងដឹកជញ្ជូនឈើចេញពីតំបន់នេះយ៉ាងគគ្រឹកគគ្រេង មិនមានសកម្មភាពទប់ស្កាត់ពីសមត្ថកិច្ចនិងមន្ត្រីជំនាញនោះទេ។ ជាពិសេសថ្មីៗនេះ ប្រជាពលរដ្ឋ នៅស្រុកអណ្តូងមាសបានប្រាប់អោយដឹងថា ក្រុមមន្ត្រីយោធាដែលកំពុងស្ថាបនាផ្លូវក្រវ៉ាត់ព្រំដែន(កម្ពុជា-វៀតណាម)ខេត្តរតនគិរី រងនូវការរិះគន់ពីប្រជាពលរដ្ឋយ៉ាងខ្លាំងថា លេងល្បិចកន្ទេលធំបន្លំដេក ដោយសារបានឈូសធ្វើផ្លូវ បើកច្រករបៀងខុសច្បាប់ ដើម្បីសម្រួលឲ្យរថយន្តកែច្នៃគ្រប់ប្រភេទនិងម៉ូតូរាប់រយគ្រឿង ដឹកជញ្ជូនឈើប្រណឹតទៅលក់ នៅប្រទេសវៀតណាម ដោយខុសច្បាប់យ៉ាងគគ្រឹកគគ្រេង ដោយគ្មានវិធានការទប់ស្កាត់ ពីសំណាក់មន្ត្រីជំនាញពាក់ព័ន្ធឡើយ ដោយសារបុគ្គលមន្ត្រី ពុករលួយមួយចំនួនតូចនោះបានលាបាតដៃទទួលប្រាក់ពីមេឈ្មួញឈ្មោះស៊ី នឿន ជាមន្ត្រីយោធា ពាក់សក្តិ៣ ដែលអ្នកមានអំណាចមានលុយនៅពីក្រោយខ្នងរួចអស់ទៅហើយ។
លោក ថង សាវុន អភិបាលខេត្តរតនគិរី ត្រូវមជ្ឈដ្ឋានមួយចំនួនរិះគន់ថា មិនយកចិត្តទុកដាក់បង្ក្រាបបទល្មើសព្រៃឈើ ដែលកំពុងកើតឡើងយ៉ាងរាលដាលនោះទេ ហើយបណ្ដោយឲ្យមេឈ្មួញឈ្មោះ ស៊ី នឿន បង្កើនសកម្មភាពបំផ្លាញព្រៃឈើក្នុងតំបន់កន្ទុយនាគស្ថិតនៅស្រុកអណ្តូងមាសយ៉ាងអាណាធិបតេយ្យ។
អ្វីដែលគួរកត់សម្គាល់នោះ គឺលោក វេង សាខុន រដ្ឋមន្ត្រីក្រសួងកសិកម្ម និងលោក សាយ សំអាល់ រដ្ឋមន្ត្រីក្រសួងបរិស្ថាន សម្ងំស្ងៀមធ្វើមិនដឹងមិនឮអ្វីទាំងអស់ ពេលដែលព្រៃឈើតំបន់ឧទ្យានវិរះជ័យកន្ទុយនាគ ខេត្តរតនគិរី កំពុងរងការបំផ្លាញយ៉ាងមហន្តរាយ។ហើយប្រសិនបើលោករដ្ឋមន្ត្រីទាំងពីរក្រសួងមិនចាត់ការបង្រ្កាបឲ្យធ្ងន់ដៃទេ ច្បាស់ជាមេឈ្មួញជាមន្ត្រីយោធាឈ្មោះ ស៊ី នឿន ដែលអ្នកមានអំណាចមានលុយនៅពីក្រោយខ្នង មិនហ៊ានគឃ្លើនបំផ្លាញព្រៃឈើដូចពេលនេះនោះទេ។
ករណីខាងលើមិនអាចទាក់ទងការបញ្ជាក់ពីអ្នកនាំពាក្យសាលាខេត្តរតនគិរី ឬមន្ត្រីសមត្ថកិច្ចជំនាញបាននៅឡើយ តែនិងសុំការពន្យល់នៅពេលខាងមុខ៕
